El vrai traval, quoè qu’ cha n’est qu’ cho ? Ch’est core eune nouvelle praque [1] ed Sarkozy, pou ch prémier d’maï. Savez, mi, el premier d’maï, j’sut adité [2] à défiler dins ches rues aveuc ches ovriers, pour ches arvindications, et cho monchèle [3] ches arvindications, à mzure qu’on o des ruses [4] pis des ruses aveuc l’imploè, aveuc sin restage [5], aveuc ech l’acatoir [6].

Sarkozy, li, i s’in vo faire el ducasse [7] du « vrai traval » ! Eune vraie cacoulle [8] à l’mote [9] Sarkozy, comme toudis [10]. Bez, mi, j’m’in vos vous l’ dire, quoè qu’ cha n’ n’est du vrai traval, echti qu’on peut avoir u bien chti qu’on cache après [11] au jour d’ojordui.

« ouvrer [12] d’ plus pour gagner d’plus », ch’est l’ biau dijage Sarkozy pour li passer à ch votache [13] ed Prézidint in 2007. Gn o pus à pa.yer d’ cotisation poent plus qu’ed conterbution dsus l’ gagnage [14] ed ches « heures d’écalot [15] ». Bé seur, gn o des gins qu’il ont pouillu n’in proufiter, d’ches heures d’écalot. Mais tous ches heures-lo, ch’est dz imploès qu’on n’donne poent à cheux qui sont à joque [16]. Quand qu’ech l’ouvrache al vient rale, faut miux l’ partager. Ch’est cho qu’on o fait in Alemane, édu qu’el smân.ne a n’ fait pus fauqu’trinte deux heures. Sans compter l’ fraudage ed ches patrons qui muchent [17] el pa.yage ed ches « primes » in heures d’écalot, pou n’poent pa.yer ches cotisations pis ches conterbutionbs qu’al vont aveuc.

El vrai traval, ch’est core el proumettage Sarkozy pour warder l’ouvrache ed ches ovriers d’ Gandrange. Ch’étoèt tout cacoulles. Ben, ches ovriers il ont fait les mêmes [18] d’interrer ech prouméttache Sarkozy, in posant eune plaque ed marpe edu qu’il étoèt récrit « Ici reposent les promesses de N SARKOZY faites le 4 février 2007 à Gandrange "Avec ou sans Mittal l’État investira dans Gandrange" ». Même el plaque ed marpe pour qu’on n’obliche [19] poent chl’aflatache ed gins [20], même el plaque al o té artirée par ches agarants [21] Sarkozy, à forche qu’ [22] il étoètent fin fiers ed leu candidot.

Ojordui, il arfait ses ezbrouffes [23] aveuc Lejaby, Photowatt, Fonderie du Poitou. Mais, pour li récaper [24]ches imploès industriels Sarkozy il o ingénié [25] des bernoulles [26] comme ech « crédit impôt-recherche », pis ch bonus-malus auto, ch’est eune rude coutance [27] pour nous conterbutions, pis cha n’vo poent à l’avnant d’ches imbauches, énon ?

Pis ch’ coq [28], ch’est l’rabachache [29] ed TVA pou ches restaurants, ch’est gramint d’sous qu’on éroèt pouillu dépinser pou l’imploè industriel. À m mote, qu’il est lo immanché commme eune troule [30] à laver du burre [31].

Faire echl RSA, après qu’on euche foutu l’brin in démélant [32] Assedic pis ANPE pour n’in faire Paul Imploè, dù qu’un implo.yé i n’o poent les mo.yens d’suire ches joqueux à forche qu’il o trop d’ouvrache, gn o poent eune buque ed sin [33] ! Pis gn o parsonne pour acouter ches joqueux. In attindis, Sarkozy pis ses agarants, iz arlouquent-e [34] dsus ches gins qui archeutent [35] un molé d’édiance RSA. Poent d’assistanat, qui ditent tertous à chl I.M.P. [36]. Awette, vo, et dire equ ches patrons i n’ paront pus d’ cotisations pis d’impôts si qu’il imbauchent, ch’est core un autère assistanat, énon ? Ch’est un sapré cop d’gambette [37] à ches droèts sociaux, pace el cotisation d’ech patron ch’est un morsiau [38] d’nou gagnache [39] qu’on n’archut poent, mais qu’on plache dins l’ caisse maladie pis dins l’ caisse artraite, pis dins l’ caisse pou récompinser [40] l’ joquage [41] Tout cho ch’est eune mécante idée, ech ploé [42] i est prins pou n’ pus jamais lzé pa.yer ches cotisations-lo. N’in vlo core un d’ cop d’ coutiau dins l’dos d’ches ovriers.

El vrai traval, ch’est seurmint poent d’avoir toudis d’ plus ed joqueux. Sarkozy, savez Colas Minteux, i dvoèt nous laicher aveuc moins d’ chinq au chint d’gins à joque à l’ définition [43] d’sin quinquina [44]. Chinq ans d’ Sarkozy, ch’est un myion d’ joqueux in plus. Ch’est tut à fait maladerché [45]. Mi, quand qu’ j’ai ouvré comme cho in m’o rinvo.yé.

El vrai traval, ch’est poent dz imploès caterneux [46], comme ches CDD pis ches interim, qu’on dégomme [47] à l’prémière simétrie [48]. Gn o jamais eu si tant d’ nouviaux dmindeux à Paul Imploè. In févérier ch’est 126 000 CDD, pis 32 300 interim qu’il ont rallongé l’affilée à Paul Imploè.

Pis, l’vrai traval, ch’est d’avoir assez suffisant d’heures à faire pou n’ poent gagner fauqu chint six chint uros, qu’aveuc cho on n’ peut même poent pa.yer sin restage.

El vrai traval, ch’n’est poent d’aller à jouque [49] dins s’ carette [50], pis d’aller s’pourcacher  [51] à l’ Armée du Salut, à ches Resto du Cœur, pour minger d’el’soupe populaire, in avant un imploé pa.yé à l’interpide [52]..…

El vrai traval ch’est core d’é n poent s’dézespérer [53], rapor à ches méneux d’ gins [54], comme i gn in o si tant à France Telecom, pis achteure dins dz autes interprinses.

El vrai traval, ch’n’est poent d’avoir un patron rinchon.neux [55], comme il ont eu Zavier Mathieu pis ches « Conti ». Toudis qu’ilz o somé [56] d’ardéculer [57] dins leu droèts in soumaquant [58] qu’ech l’interprinse al avoèt des malajutés [59] écolomiques. Qu’i fauloèt gagner d’ moins pour warder ches imploès, pis à la fin des fins tous ches imploés il s’ont invoés [60] in Romanie. Salauds d’ patrons !

Pou l’ prémier d’maï 1995, Le Pen in aute praqueux [61] d’el Droète, i faijoèt honneur à Jeanne d’Arc, pour li dintier [62] ches ovriers in route à défiler. Seulmint, gn o un d’ches agarants Le Pen, qu’il o bourradé [63] pis donné eune chuque [64] à Brahim Bouaraam qu’il o queu [65] dins la Seine, pis qui s’o no.yé pace i n’savoèt poent nanger. Resse pus qu’à espérer qu’ech l’ajouque [66] ed prézidint-candidot, qui fait les mêmes ed Le Pen, et pis core qui s’in vo faire el ducasse du vrai traval, i n’in fro poent du même parèl in 2012.

Le 27/04/2012

Dziré (Ablain Saint Nazaire, 62)