QUEU PICHON QU’ON PEUT INCORSER ?

reconnaître le poisson comestible
mercredi 3 avril 2013
par  Dziré

Queu ju [1] aveuc tous ches pichons [2] d’ Avri ! Savez, on m’ dit toudis [3] qu’ej sus cor un grand éfant. Ch’est vrai qu’ej sut in molé tère in creuyance [4] et pis j’ai fin cair [5] d’arténir [6] pis d’ardire [7] tout cho qu’on m’o raconté. Mais, quand qu’ej m’apercheus [8] equ ch’est tous pichons d’avri, ch’est lo qu’ cho m’ fait boulir dins m’ pyow [9], pace bien souvint ch’est des fin bonnes idées.
Os ons été fin bien sarvis chl’année-chi. À queumincher [10] pa’ chl histoire ed faire vnir des pandas gayants [11] dins ches montânnes [12] ed l’Arièche, equ cha varroèt [13] faijabe [14] aveuc el récauffemint d’el Terre. Ch’est bien pou l’invironn’mint, ch’est bien pour warder [15] tous ches injes [16].
Et pis, j’étoès fin bénache [17] ed vir [18] sur chl intarnète [19] ed la Posse, qu’il alloèttent prinde [20] des drones, savez des pitits aréoplanes [21] pour aller porter ches gazettes pis ches paquets dins des rincuins [22] d’ païs eq ch’est malaju [23] d’el y aller à pied pis à vélo. Pis aveuc ech manicraque-lo [24], gn’éroèt pus eune buque ed dinger à traverser un gardin [25] pour porter ches lettes, sans s’ faire morde par un thien. Ch’est in Auverne qu’il alloettent épruver [26] ch’ drone-lo, pour eune foès qu’ ch’étoèt in déors [27] ed la guerre.
Gn in o core eu dz autes d’informations, qu’a m’ont fait bien du plaiji, à preupos d’ ches poulitiques. Comme ches jornalisses belgicains, qu’il ont annonché qu’ Carla-Colas Sarkozy-Bruni, il alloettent vnir rester amon Mannekennpisse, pour eusses én’ pus t-ête inchpés [28] aveuc chl affaire Bettencourt. Gn o d’quoè avoir queuques doutances [29] in intindant cho, mais, savez mes gins, ch’est bien li, Sarkozy, qu’i nous o apprins ed toute i vnoèt possibe…. Alorse, pourquoè qu’ cha n’ s’ro poent creuyabe ?
À l’télé France 24, il ont annonché el mariache d’ Hollande aveuc….Valérie Trierweiler ; ch’est vrai quoè, il ont étou l’droèt d’es marier comme tout l’monte. El mariache ch’est pour tartous asteure.
Et pis cor eune aute nouvelle, Roselyne Bachelot, qu’asteure alle est bien vaccinée contère el poulitique, a s’in vo faire du chinémo. Alle s’in vo faire el chochonne [30] James Bond, eune « James Bond gueurle ». Dpis l’acou [31] qu’il ont aveuc « Pus belle la vie » eq’ ches gins i s’arconnoîtent dins ches personnaches d’ech feulleton, ches faijeux d’ches flims James Bond, il arnonchent à des fèmes qu’il ont des tètes [32] comme des poturons [33], pis des gambes [34] d’un mète vint ed long, gn in éro pus aveuc James Bond. Asseuré [35] qu’i gn o cor gramint d’fèmes qu’ alles arsânnent-é [36] Roselyne Bachelot. Pis qu’alles sairont [37] s’arconnoîte dins Roselyne in défeuillé [38]. Ch’est fin bien comme cho, os poyez l’ardire alintour ed vous.
Spindant gn in o eu quiques-uns des pichons d’avri, lundi passé, qu’on o vu tut d’suite ches nanjoires [39] qu’alles équipent-é [40]. Comme echti-chi :on nous annonche qu’i gn éro du rabachage [41] d’acatoir [42] pou ches pinsionnés [43], aveuc l’invintion [44] d’eune nouvelle taxe, pis qu’ches pinsions [45] a n’suiront [46] pus l’rinquère [47] ed ches coutances [48]. Os n’ creuyez tut d’même poent qu’ej min vo l’ gober chelle-lalle ? Os allez vir qu’is varront bétôt nous dire qu’i faut qu’os payonches [49] nous arténue d’ pinsion [50] quiques années d’plus pour avoir el droèt d’artoucher eune pinsion intière, n’in vlo cor chi un nouviau d’pichon d’avri. Tout cho ch’est des cacoules [51] ed gins qu’i n’ont pos cor invo.yé [52] parsonne cacher à l’ bitarde [53] , énon ?

Le 02/04/2013

Dziré (Ablain Saint-Nazaire, 62)


[1queu ju : quelle affaire

[2pichon : poisson

[3toudis : toujours

[4tère in creuyance : litt. tendre de croyance, c’est-à-dire crédule

[5avoir fin cair : aimer beaucoup

[6arténir : retenir

[7ardire : répéter

[8j’m’apercheus : je m’aperçois

[9boulir dins s’pyow : frémir de colère

[10queumincher : commencer

[11gayant : géant

[12montânne : montagne

[13varroèt : viendrait

[14faijabe : faisable

[15warder : garder

[16inje : race, espèce

[17bénache : content

[18vir : voir

[19intarnète : site internet

[20prinde : prendre

[21aréoplane : avion

[22rincuin : recoin

[23malaju : malaisé, difficile

[24manicraque : appareil

[25gardin : jardin

[26épruver : tester

[27in déors : hors

[28inchpé : embarrassé

[29doutance : doute

[30chochonne : partenaire

[31acou : succès, audimat

[32tète : téton, sein

[33poturon : potiron

[34gambe : jambe

[35asseuré : assurément, bien sûr

[36arsânner : ressembler à

[37sairont : de savoir, sauront

[38défeuillé : petite tenue

[39nanjoire : nageoire

[40équiper : dépasser

[41rabachage : baisse

[42acatoir : pouvoir d’achat

[43pinsionné : retraité

[44invintion : invention

[45pinsion : retraite

[46suire : suivre

[47rinquère : augmentation

[48coutance : prix – rinquère ed ches coutances : inflation

[49payonches : subjonctif du verbe payer

[50arténue d’pinsion : cotisation retraite

[51cacoule : blague, mensonge

[52invo.yé : envoyé

[53cacher à l’bitarde ou cacher à l’ bibée : faire faire un déplacement inutile aux gens simples et crédules, à l’occasion du 1er avril


Agenda

<<

2018

 

<<

Avril

 

Aujourd’hui

LuMaMeJeVeSaDi
2627282930311
2345678
9101112131415
16171819202122
23242526272829
30123456
Aucun évènement à venir les 6 prochains mois

Brèves

contacter les rédacteurs

lundi 28 mars 2011

J’ai rchu quiques messaches invo.yés par ches lijeux. Jé lzé li, pis core j’ai poent pouillu rinfliquer pache vous messaches i sont invo.yés dins m’ boète à lette par ech manicraque. Pour mi savoir édu adercher l’ rinflique, fauroèt qu’os laichèches vou adrèche mail dins ch tesque d’ech messache.
Amiteuzmint
Dziré

Pour une réponse personnalisée à un contact avec un rédacteur, il est indispensable de laisser votre adresse mail dans le corps du message.