VIVE MARIACHE-TARTOUS !
par
El nouvelle loè [1] pour marioler [2] deux honmes u bien deux fèmes insânne [3], ch’est un rude cop d’ hasard [4] pour ches bouticliers [5].
On o toudis [6] bien raison ed dire equ chl’estil [7] el pus vius dsus la terre du monte, pis dzous la cabe du ciel [8], ch’est l’ bouticliache [9]. Ech l’inque [10] d’ech papier qu’on o récrit challe loè padzeur [11], a n’o pos cor réchué [12] qu’on vind déjo par tout partout du mariache-tartous [13] !
Réguyèrmint ches gins-lo, is cachent [14] après des pratiques [15]. Ech cop chi, is saitent d’avanche qu’i gn éro des crients, pis qu’i faut leu duire [16] à ches crients-lo, in lz énortant [17] à acater [18] dz attrape-argint [19] arrinjés esprès [20] pou ch mariache-tartous.
Ches Américains, is sont déjo mortels à [21] l’chérémonie laïque, un épouriche [22] ed beffroé [23] pour rimplacher ech curé pis ches cloques quand qu’on s’marie fauqu’à l’mairie.
On l’ fait déjo pour ches-lo, honmes et pis fèmes, qui n’veutent-é pos u bien qu’is n’ peutent-é pos passer dvant ch’ curé. Eune chérémonie laïque, ch’est pour s’marier in grand pontificat [24], quand qu’on n’va fauqu’ à l’mairie, pis qu’ in étant pouchézonmes [25] u bien pouchéfèmes [26], on n’ peut poent s’pantaliser [27] dins chl’églisse.
El chérémonie laïque, on peut el’ l’invintionner [28] à s’mote [29], faire l’iroquoès [30], avoir tous les rubriques [31] tous les boutardes [32] pour faire autermint pis plusse qu’elzautes. Ch’est à chti qu’il éro l’plusse d’invin [33]. Spindant faut qu’cha rsânne [34] ches mariants. On peut toudis cor rassânner [35] ches invités padzous des fausses portes [36] à l’mason d’echti qui fait « mariante » et pis sn aller in cortèche par dryère un cordéïon pis un ringningnin [37] à ch beffroè.
Ech faijeux d’ dors [38], il o dessaqué des anniaux [39] aveuc du noir au mitan [40] pour ches mariaches-tartous. Cho duit gramint à ches mariants d’ech mariache-tartous, qu’is ditent, ch’est comme el marche ed ches glorieuztés [41].
Tout cho qu’on fait à ches mariaches, cha vo canger [42] aveuc ech mariache-tartous ; dsus ches pièches montées, savez ches watiaux comme des qu’minées d’useines, faut pouilloir mette des pitites postures [43] amoutrant deux onmes, deux fèmes, pis cor warder un onme pis eune fème. Ches ingagemints [44] au mariache ch’est pus parèl, ches voyages ed noce, pis cor el plache [45] pou l’ tabarie [46].
Cho qui lzé fait baviller [47] ches bouticliers, ch’est qu’on o fait des gaujaches [48], pis qu’ ches pouchézonmes [49] pis ches pouchéfèmes [50], ch’est des gins qu’il ont plusse d’inducation [51], qui ressent [52] dins ches villes, qui n’ont poent d’éfants pis qu’il ont plusse d’acatoir [53].
Gn in o d’ches pus délicotés [54] qu’il ont fait des wèpes [55] edù qu’in peut cacher après un ajodreux d’ mariaches [56], des capiaux-buches [57] pis des capotes à pans [58], des vo.yaches ed noce.
Mais l’pus mius, ch’est cor echti qu’il o queuminché à conter. Il o truvé qu’il avoèt affaire à un marqué ed 4 myiards pis eune mitan d’uros. I attind 7 000 mariaches-tartous par an dins ches deux prumières années. Comme il o conté 30 000 uro par mariache cho fait 2 chints myions d’uros à récour [59]. Pache on dépinse mitan d’plus pour un mariache-tartous equ pour un mariache réguyer.
Après il attintent chinq mille mariaches-tartous tous lz ans.
Alorse, ch’est à chti qui sro l’pus rade à attraper ches crients. Gn o toutes sortes ed wèpes qu’il épanitent [60] padzeur echl ‘intarnète :
gn in o cor un qu’il o ingénié un wèpe www.divorce-gay.fr pache on peut faire el prédijache [61] ed disvorces tous lz ans, pache gn éro un mariache-tartous dins deux qui s’déféniro in disvorce.
Le 30/05/2013
Dziré (Ablain Saint-Nazaire, 62)
[1] loè : loi
[2] marioler : marier
[3] insânne : ensemble
[4] cop d’hasard : aubaine
[5] bouticlier : commerçant
[6] toudis : toujours
[7] estil : métier
[8] cabe du ciel : calotte des cieux
[9] bouticliache : commerce
[10] inque : encre
[11] padzeur : dessus, par-dessus
[12] réchué : séché
[13] mariache-tartous : mariage pour tous
[14] cacher : chercher
[15] pratiques : clients
[16] duire : plaire
[17] énorter : inciter
[18] acater : acheter
[19] attrape-argint : marchandise vendue au dessus de sa valeur
[20] arrinjé esprès : conçu
[21] ête mortel à : aimer à la folie
[22] épouriche : exagération de toilette
[23] beffroè : beffroi
[24] in grand pontificat : avec beaucoup de cérémonie, en grande tenue, en grande pompe
[25] pouchézonmes : gay, homosexuel
[26] pouchéfèmes : lesbienne, homosexuelle
[27] s’ pantaliser : se carrer, se pavaner, se rengorger, s’étaler aux regards du public
[28] invintionner : inventer
[29] à s’mote : à son gré
[30] iroquoès : original
[31] rubrique : caprice
[32] boutarde : caprice
[33] invin : esprit inventif
[34] rsânner : ressembler à
[35] rassânner : rassembler, regrouper
[36] fausse porte : sorte d’arc de triomphe ou portique de verdure ou d’étoffes érigé à l’occasion de la cérémonie
[37] ringningnin : violon
[38] faijeux d’ dors : bijoutier
[39] anniau : alliance
[40] au mitan : au milieu
[41] glorieuzté : fierté
[42] canger : changer
[43] pitites postures : figurines
[44] ingagemint : faire-part ; cf. ingager à l’interremint
[45] place : lieu, salle
[46] tabarie : banquet
[47] baviller : saliver, baver
[48] gaujache : sondage
[49] pouchézonmes : gay, homosexuel
[50] pouchéfèmes : lesbienne, homosexuelle
[51] inducation : éducation, diplôme
[52] ressent : habitent
[53] acatoir : pouvoir d’achat
[54] délicoté : adroit, rusé
[55] wèpe : de web, site internet
[56] ajodreux d’mariache : wedding planer, chef de projet mariage
[57] capiau buche : haut de forme
[58] capote à pans : queue-de-pie
[59] récour : récupérer, récolter
[60] épanir : épanouir
[61] prédijache : prédiction