EL CULTURE ET PIS L’ CASTROLOMIE .....

samedi 4 janvier 2014
par  Dziré

"El Culture et pis el Castrolomie cho fait deux", comme dit chti-lo. Acoutez un molé chelle-chille :
Cho qu’minche fin bien deux mil quator… Ch’étoèt verdi el deux d’ jinvier, os arvénèmes d’faire ches commissions à chl’ ypermarqué, os acoutèmes el tardiole [1] dins l’carette [2]. Ch’étoèt l’heure d’el cronique castrolomique, pis l’méneuse [3] al aspliquoèt ecmint faire ches flamiques à l’ fèfe [4] , ches galettes, comme qui ditent ches fransés.
In o ardit qu’i faulloèt un éfant à quate pattes padzous l’tafe [5] pou dire echti-lo qui minjro el darnièr morsiau d’flamique qu’on vient d’ décoper. Après cho, el méneuse al o vnu à parler d’ ches fèfes qu’on insaque [6] dins ch’ démélache [7] à gatiau. Cho canje tous l’z ans comme la mode, cho fait qu’on o eu des personnaches d’el crèche, ches beffroès, ches personnaches ed bindes à dessins Tintin pis Astérix. Mais, qu’al dit chl’année chi , jé n’sais poent queus fèfes qu’on s’in vo mucher [8] pis truver [9] dins ches flamiques. Al s’apinse tout in parlant, à ch darnier ahoquache [10] qu’on o fait à ch’ Loufe ed Lins. Al o intindu eune vaque braire mais a n’sait pius dins queulle étafe [11]. Cho fait qu’a n’sait poent ardire comme i faut cho qu’al o intindu. Pour elle ch’est eune esposition d’ches Étruques.
Al pinsoèt qu’on alloèt arproduire in tout pitit des pièches d’ art « Étruque » pour n’in faire des fèfes, t’as qu’à vir !
Faut li dire à chelle fème qu’eune étruque [12] ch’est eune équette [13] ed bos u bien un ftu [14]d’palle [15], intandisse qu’à ch’Loufe ch’est des oeufes du vius temps d’ ches Étrusques, qu’on peut li aller vir !
Ches Etrusques, il ont vi [16] in Toscane, (ch’est un cuin d’l’ Italie d’ojordui) edpis l’an huit chints padvant Jésu Crisse. À l’cantourne ed [17] l’an chint chints padvant Jésu Crisse, il ont eu à ténir carrure à [18] ches Romains pis ch’est eusses qu’il ont pardu.

Le 4 janvier 2014

Dziré (Ablain Saint-Nazaire,62)


[1tardiole : radio

[2carette : automobile

[3méneuse : animatrice

[4flamique : tarte, flamique à fèfe : galette ou tarte à fève

[5tafe : table

[6insaquer : insérer

[7démélache : pâte, mélange des ingrédients

[8mucher : cacher

[9truver : trouver

[10ahoquache : accrochage, exposition temporaire

[11étafe : étable, elle n’est pas en mesure de répéter ce qu’elle a entendu

[12étruque : petit éclat de bois ou de paille

[13équette : copeau, écharde

[14ftu :fétu

[15palle : paille

[16vi : vécu

[17à l’cantourne ed : aux environs de

[18ténir carrure à : se mesurer à, résister à


Agenda

<<

2017

 

<<

Octobre

 

Aujourd’hui

LuMaMeJeVeSaDi
2526272829301
2345678
9101112131415
16171819202122
23242526272829
303112345
Aucun évènement à venir les 6 prochains mois

Brèves

contacter les rédacteurs

lundi 28 mars 2011

J’ai rchu quiques messaches invo.yés par ches lijeux. Jé lzé li, pis core j’ai poent pouillu rinfliquer pache vous messaches i sont invo.yés dins m’ boète à lette par ech manicraque. Pour mi savoir édu adercher l’ rinflique, fauroèt qu’os laichèches vou adrèche mail dins ch tesque d’ech messache.
Amiteuzmint
Dziré

Pour une réponse personnalisée à un contact avec un rédacteur, il est indispensable de laisser votre adresse mail dans le corps du message.