Savez mes jins, j’avos fait in mot d’ billet à ches courts jours l’année passée, pour aspliquer queumint qu’in aprétot éch blé pour nous l’ vinde dins ches ypermarkés. Ches pousseux d’ éteules blanques (céréaliers) i voulètent arprinde in bout d’ marké à ches pousseux d’ légueumes (maraîchers). J’ai attindu éd l’avoir assa.yé pour vous n’in parler. J’ai acaté in saclé éd deux chints grammes à ch’ l’ ypermarké pou in uro pis sochante neuf chintimes. Ch’est fin minjape, in peut l’mète aveuc du riz o bin miux in molé d’ quinoa.
N’ y o pont d’ seurprinsse après avoir minjé, in n’ chifèle pont conme ches canariens.
Asteur éj vous laiche lire éch billet d’ l’anée passée.

Queumint qu’in arbattro ses otons, asteur qu’in vind éch bléy tandis qui n’est pont meur ?Des grayns d’bley dins vous telle (assiette) mes jins, asteur ch’est possipe. Vlo d’jà près d’ vingt chinq ans qu’ ches cinsiers ed la Beauce jusse au sut’ ed Paris qui z-ont caché a qui épis queumint qui pourrèt’ent é vinte lu bley. Adon in n’ connichot qu’ech l’ esmoul épis ch’bley épautré, mais minjé des grayns intiers follot pont n’y pinsé tellemint qu’ech cuisage i étot long, n’y avot parsonne qui s’arot animé à faire cha. In a caché après des jins qui cach’ tent, un laboratoire ed’ l’INRA il o queuminché à caché. Ches cinsiers y z-ont qeuji des cacheux qui étètent adités à ouvré su ches noules qu’in fait aveuc du dur bley. Ech mait’ d’ arcache i o dit qui zont eu gramint d’russes pache qui follot pouilloir intiqué dal yo dins ches grayns pindant qui cuijét’ent. Is ont fait cha in s’ servant del yo epis del caleur.
In preum, in queuminche à cuire un molé ches grayns ed’ bley, et in deusse in z-é gonfèle comme cha lu’ piau tindue al va laiché l’yo passer gramint pus vite tandis qui cuit dins vous coué. Asteur, in dix minutes ech bley i est cuit. In peut trouver ch’ bley lo dins ches supermarkés à côtey d’ech riz epis d’ches noules.
Dins ch’ grand sut’ tros coopératives in Languedoc-Roussillon cachèt’ent in mo.yien ed’ vinde lu bley. Pou cha i follot acliper (attirer) chal pratique (les clients) aveuc lu vert bley, qui arsanne à ch’ frekeh, un plot del mediterrannée . Ch’est core les min.mes cacheux ed’ Montpellier qui busit’ent such’ t’ affaire :
I doèt’ent ete capapes ed faire in akrinkillache pou récour ech grayn tandis qu’il est pon meur épis après cha del’ dessaquer dé s’n’ épi. Quand qu’in à fait ches machines, i resse core a rinde ech grayn gramint pus ter (tendre) pour pon ébarzillé (casser) ses dints in minjant du bley qui n’est pon meur. Pou inlevé ches durtes piaux, in doèt faire deux cuisages l’un après l’aute. Après cha n’y o pu qu’à widier ch’l’air dech’ l’infardelache ed ches biaux grayns vert ter, such l’étiqué os pourrez lire chal marque GRINN’s. Comme in dit "bétot à ch’ l’étalache" (Prochainement sur vos écrans). Moralitey : in n’porras min.me pus arbatte ses otons i séront vindus !

Le 08/08/05
Dziré , (Ablain Saint-Nazaire, 62)