CHA VA COR MALBOULLIR !

nouvel échec en vue !
dimanche 2 février 2014
par  Dziré

Méfie-t-à ti, Choès [1], cha va cor malboulir [2].
El neuf ed sectimpe 2012, Choès Prézidint [3] , il avoèt dit « D’chi d’un an, os verrez qu’el trache [4] d’ech joquage [5] a s’in vo ardévaler [6], ch’est mi qu’ jé l’dit ». Os ons voté pour avoir un prézidint, poent pour avoir un advigneux [7], énon ? Quoè qu’ch’est n’ n’est qu’i s’o mis dins ses lornes [8] ?

Au moès d’avri ed 2013, i o fait ses praques [9] aveuc eune boète à z-outius [10], pour li plo.yer [11] el trache d’ech joquage. Spindant il o ardélayé [12] sn avertance [13] à l’ définition [14] ed l’année 2013. Ch’n’est poent l’ talle [15] d’el boète, poent plusse qu’el coleur [16] d’el boète à z-outius qu’al fait chl’ovrier.
À vous mode, un hon.me d’afu [17], cha n’est poent quiqu’un qu’il o té muni [18] à l’ENA , gn o poent d’sin [19] une buque, énon ? L’insinnemint [20] d’estil [21] d’un bon ovrier ch’est poent à l’ENA qu’in l’ treufe [22] !
Aveuc el canjmint [23] d’année, vlo qu’echl’ ovrier Hollande i nous prézinte el facture :
À l’définition 2012, Paul Imploè [24] il avoèt conté 3 132 900 joqueux [25] complétmint sans ouvrache. Un an tout jusse après, à l’ définition 2013, Paul Imploè il o arconté ches joqueux complètmint sans ouvrache, pis vlo qu’i n’ n’o truvé 3 300 200 ! Gn in o 177 000 ed plusse. Tous les ans gn in o toudis des joqueux in plusse. Si bel et si bien qu’in contant tous ches-lo qui n’ peutent poent ouvrer à temps complet in treufe 5 myions deux chint mille joqueux dins l’ douche [26] Franse, t’as qu’à vir !
Pus pire equ cho, el caisse ed récompinsache [27] ed ches joqueux qu’on l’l’appelle Unedic, al o fait un prédijache [28] ed 63 200 joqueux complètmint sans ouvrache ed plusse pour chl’année chi. Queumint qu’ch’est qu’os frons pour nous avoir fiate [29] à li ?

El pus pire, ch’est qu’après qu’il euche [30] vu l’cop d’temps [31] aveuc echl’ augmintation d’ech joquache, Choès Prézidint il o dessaqué [32] d’sin capiau-buche [33] un nouviau lapin, comme si qu’i sroèt [34] un vrai fézicien [35]. Vlo ti poent qu’il annonche qui s’in vo faire disconte [36] ed ches cotisations d’ allocations familiales à ches patrons pou qu’is treuftent-é mèche [37] d’imbaucher des joqueux. Choès i veut lzé faire siner [38] un contro [39], mettons qu’Hollande pis ches patrons is doètent-é faire eune convnanse [40] insanne [41]. Ch’est qu’i leuz o proumis eune disconte ed 35 myiards d’uros, fauqu’cha ! Pis cor il o roblié d’leu d’minder ches imploès in écange, queul torniche [42] qu’os ons-lo ! Quand qu’on li fait ermarquer qu’ tout cho ch’est poent vraimint socialisse, Choès, i répond : « Mi ej sut un social-berloqueux [43], poent un socialisse ! »
Gattaz, el patron d’ches patrons, il o arnonché à dire qu’on alloèt faire un myion d’imploès aveuc ches trinte myiards ed disconte padzeur el cotisation d’allocations familiales, margrè qu’il euche el proumettache d’ech myion d’imploès récrit dzeur un affiquet [44] qu’il infique [45] à l’ verse [46] d’és capote [47].
Peut qu’manquer [48], à cht’heure i faut tout armette in culbute [49] pis faut fusquinter [50] dins tous ches muches [51] pour artruver 35 myiards d’uros pour én poent décesser [52] d’pa.yer ches « allocations familiales ».

Le 31/01/2014

Dziré (Ablain Saint Nazaire, 62)


[1Choès : François

[2malboullir : avoir une mauvaise issue, ne pas réussir comme on le voudrait (une affaire, une entreprise)

[3Choès Prézidint : François Hollande

[4trache : trace, courbe

[5joquage : chômage

[6ardévaler : redéscendre

[7advigneux : devin, prophète

[8lornes : pl. tête, esprit

[9praque : forfanterie, embarras

[10boète à z-outius : boîte à outils

[11plo.yer : plier

[12ardélayé : différé

[13avertance : prémonition, préssentiment

[14définition : fin

[15talle : taille

[16coleur : couleur

[17honme d’afu : professionnel compétent ; c’est un homme ingénieux,futé, sachant se tirer habilement d’un pas difficile ou d’une affaire embarrassante

[18muni : dressé, formé

[19sin : sens, bon sens

[20insinnemint : enseignement

[21estil : métier

[22treufe : trouve

[23canjmint : changement

[24Paul Imploè : prête-nom pour Pôle Emploi

[25joqueux : chômeur

[26douche : douce

[27récompinsache : compensation, indemnisation

[28prédijache : prédiction

[29avoir fiate à : faire confiance à

[30euche : subjonctif du verbe avoir, après qu’il ait

[31vir el cop d’temps : voir la tournure des événements, prévoir ce qui va arriver

[32dessaqué : sorti

[33capiau-buche : haut-de-forme, gibus, accessoire du prestidigitateur

[34comme si qui s’roèt : comme s’il était , conditionnel, en picard, le « si » adore le « .. rait » au contraire du français

[35fézicien : escamoteur, prestidigitateur

[36disconte : escompte, ristourne, remise

[37mèche :moyen

[38siner : signer

[39contro : contrat

[40convnanse : convention, pacte

[41insanne : ensemble

[42torniche : étourdi, écervelé

[43berloqueux : pendant, oscillant, fig.changeant ; social-berloqueux : social-démocrate

[44affiquet : pin’s, épinglette

[45infiquer : enfoncer, ficher

[46à l’verse : au revers

[47capote : veste

[48peut qu’manquer : qu’importe

[49armette in culbute : tout retourner, mettre le bazar, le désordre

[50fusquinter : fouiller en éparpillant

[51muche : cache, niche

[52én poent décesser : continuer


Agenda

<<

2017

 

<<

Août

 

Aujourd’hui

LuMaMeJeVeSaDi
31123456
78910111213
14151617181920
21222324252627
28293031123
Aucun évènement à venir les 6 prochains mois

Brèves

contacter les rédacteurs

lundi 28 mars 2011

J’ai rchu quiques messaches invo.yés par ches lijeux. Jé lzé li, pis core j’ai poent pouillu rinfliquer pache vous messaches i sont invo.yés dins m’ boète à lette par ech manicraque. Pour mi savoir édu adercher l’ rinflique, fauroèt qu’os laichèches vou adrèche mail dins ch tesque d’ech messache.
Amiteuzmint
Dziré

Pour une réponse personnalisée à un contact avec un rédacteur, il est indispensable de laisser votre adresse mail dans le corps du message.