Choès [1], ech prézidint qu’os ons cuji [2] à ch votache [3] ed 2012, pour rimplacher ch’ broulle-toute [4] ed Neuilly, qu’il avoèt maladerché [5] contère la Crisse, pis fait plusse d’espradronnache [6] equ’ d’ouvrache, Choès, i sânne [7] inchpé [8] comme eune glène [9] qu’al o truvé [10] un coutiau.
Pour ches boutiques ed barzuquache [11] qu’al euvent [12]el diminche, pou l’ conterbussyon [13] à 75 dins chint pour ches gagnaches [(gagnache : salaire, rémunération]] dzeur un myion d’uros par moès, pour ches imploès récompinsés [14] par ches patrons in écange [15] d’un disconte [16] dzeur el cotisation d’allocations familiales, pour laicher rintrer ches affligés [17] , dins tous ches bâtimints, Choès, pis sin gouvernmint Ayraultique u bien errotique (jé n’sais poent au jusse equmint qu’ch’est qu’i faut l’ récrire), i démérite un fin biau tripèle [18] « A » [19].
Pache, pour li, equ ch’est un social-berloqueux [20] gn o qu’eune mèche [21] ed faire esn ouvrache, surtout si qui gn o l’moindère vindication [22], ch’est : « Attindons [23], Acoutons [24]…Ardéculons [25] ». Attindons ch’est l’« A » d’edvant, Acoutons ch’est chl’ « A » du mitan [26] pis cor Ardéculons cho fait chl « A » d’ech culot [27]. Queumint qu’ ch’est qu’os volez qu’on euche [28] fiate [29] à eusses !
Faut poent proumette [30] plusse ed burre [31] qu’ed pain.

Le 26/02/2014

Dziré (Ablain Saint-Nazaire, 62)