TIRE TES LOQUES POUR FAIRE DU GENRE

À POIL POUR FAIRE DU GENRE !
jeudi 20 mars 2014
par  Dziré


Os connichez propabe un délommé Jin-Frinchoès Copé, savez chti-lo qui lanche [1] edz affarées [2] d’billets à sin nom dins ches urnes ed votache IMP pour li t-ête l’ prézidint d’ech parti.
Vlo ti poent qu’echt homme lo il o boulé court [3] d’arniquache [4] après ch governmint socialisse. Comme toudis, vlo qu’il eufe es gueule quand qu’i n’o mie rien à dire. Pour cho faire, min Copé, i vo arprinde [5] ches esclandes [6] ed Civitas un acheuchonnache [7] d’atargés [8] catoliques [9] qu’il ont fait ches afilées [10] contère el mariache-tartousse. Intandisse qu’à l’école ches clercs [11]ils épreuftent [12] ed mette ches pitites files pis ches pitits garchons d’estèque [13], des fouteux d’imbroulle ils ont truvé mèche [14] ed faire une mascarade d’idées pour aspliquer dsus ches téléphones portapes qu’on induque ches tout pitits à canger d’ genre : un garchon i peut cujir d’evnir file pis eune tite file al peut cujir d’evnir garchon. T’as qu’à vir tout cho qu’on peut apprinde à l’école. Cho fait qu’ches pus braques [15] pis ches pus tères in creuyance [16] dins ches parints, il ont artiré leu jonnes ed l’école, sans dminder l’moindère buquette d’asplication à ch’ clerc !
Ch’est à ch’momint-lo qu’ Civitas, ches atargés catoliques, il ont dmindé à l’ cân.ne [17] ed télé Arte d’én poent passer ch flim « Tomboy » equ ch’est eune histoire ed garchon findu [18].
Mais, ch’est pos cor assez pour li faire sin rinquinquin [19], Copé, il o arprind un aute arniquache à preupos d’ech life pour ches pitits « Tous à poil ». Quand qu’il o li ch life-lo sin san i n’o fait qu’un tour, et pis cor il o vnu tout droèt blasonner [20] pis dimbler [21] dins ches radios pis ches télés..
Pour li aller nanger aveuc Takkiedine sin san il o fait deux tours, pour étriver pis décatourner des sous pour ses chochons d’ Bygmalion sin san il o fait troès tours, pis pour li songner [22] ches urnes ed l’ IMP et pis cor s’artruver prézidint d’ech parti, on peut mie pus lzé compter ches tours.
« Tous à poil » ch’est un pitit life pour des tout tiots, qui leuz amoute [23] qu’on artire ses loques [24] padvant d’prinde [25] sin bain à la mer. Pis qu’ch’est poent hontape [26] d’es mette tout nu pour aller dins l’iau.
Gn o poent lo ed quoè faire si tant d’ vindication [27], énon ? Spindant gn’éro toudis des pouliticards comme des cocrodiles [28] qui faitent [29], comme Copé, gramint aveuc leu gueule pis arien aveuc leu bros [30].
Pis mi jé n’sus poent eune buque rancuneux, alorse min pitit Copé té porros bétôt lire ech biau life ed ches frères pis d’ ches sœurs , ech liméro 17 d’ches p’tits diables récrit par Dutto amon [31] soleil sur la BD, equ j’ai mis chl’imache ichi à l’appoè [32].

Le 19/03/2014

Dziré (Ablain Saint-Nazaire, 62)


[1lancher : fourrer

[2affarée : quantité

[3il o boulé court : s’est trouvé dépourvu

[4arniquache : critique

[5arprinde : reprendre

[6esclande : esclandre

[7acheuchonnache : association

[8attargés : arriérés

[9attagé catolique : intégriste

[10affilée : défilé, manif

[11clerc : instituteur

[12épreuftent : essayent

[13d’estèque : à égalité, de parité

[14truver mèche : trouver moyen

[15braque : écrevelé

[16tère in creuyance : litt tendre de croyance, càd crédule

[17cânne : chaîne

[18garchon findu : garçon manqué, qui se dit tomboy en anglais

[19faire sin rinquinquin : regimber, faire le mutin

[20blasonner : médire, critiquer

[21dimbler : dire du mal, calomnier

[22songner : soigner

[23amoute : montre

[24loques : vêtements

[25prinde : prendre

[26nontape : honteux

[27vindication : ressentiment, vengeance, mais aussi dénonciation

[28copcrodile : crocodile

[29qui faitent : qui font

[30bros : bras

[31chez, éditeur

[32ichi à l’appoè : ci-contre


Agenda

<<

2017

 

<<

Août

 

Aujourd’hui

LuMaMeJeVeSaDi
31123456
78910111213
14151617181920
21222324252627
28293031123
Aucun évènement à venir les 6 prochains mois

Brèves

contacter les rédacteurs

lundi 28 mars 2011

J’ai rchu quiques messaches invo.yés par ches lijeux. Jé lzé li, pis core j’ai poent pouillu rinfliquer pache vous messaches i sont invo.yés dins m’ boète à lette par ech manicraque. Pour mi savoir édu adercher l’ rinflique, fauroèt qu’os laichèches vou adrèche mail dins ch tesque d’ech messache.
Amiteuzmint
Dziré

Pour une réponse personnalisée à un contact avec un rédacteur, il est indispensable de laisser votre adresse mail dans le corps du message.