Ches feules alz ont queu, ches jours i racourchtent. Ches dayas i sont au coué à l’ cafe, pis ches carottes al sont in muche. L’ ér al est frèque. El gauje à caleur,- éch termomète - al ardéchint . D’ichi in tiot copon d’ tan, el timpérature à n’ armontro pu dins l’ jour, pis chal terre al durchirot in avandeur (profondeur), pis core éch frod i collero ches feules queutes su chal terre, tandisse équ ches insèques pis ches viers i s’intiqueront (s’enfoncer) pus avant (profondément) pour eusses rester au caud pou ches courts jours. Ch’est con.me cho équ ches oujows i n’ peutent-è pus mier. Pis après cho ch’est l’yow qu’al jélro , alorse ches oujows i n’ pourront pus boire, que misère !
Ech gardinier i n’ peut mie laicher faire cho il o bzon d’ ches oujows pour li t-ête déblayé d’ ches insèques pis d’ ches vermines, qui inva.ichent-è ches parcs à légueumes. Ches affrontées sittelles al font grimpète su ches tronches d’apes in buquant aveuc leu bec dsus l’ écorche finchlée (fissurée) d’ ches peumiers pis d’ ches poériers pou n’in faire débuquer [sortir d’une cachette) ches insèques, qu’al minjent-è con.me des goulafs. Ches mazingues (mésanges), ches bleuzes pis core ches carbon.nières al déchartent ches lichens pis ches mousses qu’à n’ veutent-è pont prinde à terre.
Ravisez, i sont tertous bien animés dins ch’ gardin, ches fouroules (rouge-gorge) pis ches mouchons (moineaux), ches verdyères (verdier), ches mouviars (merle), ches pofignons (troglodyte), Ech fouroule, li i cache sin péqueume à terre. Ech pus ardi ch’est core ech pofignon, ch’est aussi ch’ pus pitit. Il est gri in molé roux pis il ardrèche és queue à l’ équerre. Mi j’ai core quère à l’acouter chiffler, ch’est in vré artisse, i sait faire des triles, des notes détaquées des notes longues pis loyées, eune vré pitite "La Callas". Ch’est pont creuyape qu’in tiot-oujow éd chinq si chintimètes i peuche chiffler si fort. Ech pofignon i cache à minjer dins ches tiots buchons. Ch’est pour cho qui vous aguette quiques fos intandisse qu’os copez vous rosiers.
Ech fouroule, li, ch’est core in féron (très curieux) qui vient fertouiller (remuer) chal terre edu, qu’os êtes in route à fouir (bêcher). Ch’est souvint qu’éj sut inchpé (embarrassé) pa ch’ fouroule. Faut dire équ min gardin, il o des vancelles (liseron rampant) qu’al sont ddins edpis eune éternam (fort longtemps), cho fait qu’éj sut oblijé d’ artirer ches racheines ed vancelle après qu’ j’ai artourné eune palée. Ch’est a ch’ monmint-lo qu’éch l’ affronté fouroule i vient pauser dsus ch’ potignon (crosse,*) d’éch louchet (bêche).
Alorsse lo, ech gardinier, i n’arprind pus sin louchet tant qu’éch l’oujow i resse jouqué (juché) padzeur éch’ manche.

Ches oujows d’ ches bos pis d’ ches camps alintour i vont vnir s’ mette aveuc eusse. Ches rouvyus (bouvreuil), ches étournyows, ches tourtreuls ches doubel-grives.
Os allez pouilloir leu don.ner à minjer aveuc dal crach (graisse), des grains d’ tournosolé, du bley ébarzillé (concassé), du blé millet des pos pis des viers ed freine.
L’ yow i faut pont el laiché prinde pa ch’ gel. I faut pont l’ chukrer, pis pont l’ goutter (ajouter de la goutte, de l’alcool).
Faut core aplacher ch minger pis ch boire au lon d’ ches cots qui n’attindent-è fauqu’ cha : ej dirot byen qu’ "i z attindent qu’ éch l’oujow i quaiche direc dins leu bec", mais tertous i sait qu’ in cot cha n’o pont d’ bec, énon ?

(*, la crosse du manche de bêche est dénommée "crochon" en rouchi, "béquile" à Lumbres, et "potignon" à Saint-Pol ; ne pas confondre "potignon" crosse du louchet avec "pofignon" qui désigne le troglodyte mignon)

Le 02/12/2006
Dziré (Ablain Saint Nazaire, 62)