RUGBY : FAUT QU’ CHA PETE
par
Faijons un molé on.neur à l’ gobe d’éch glope [1] ed rugbi qu’al est in train d’és définir. Os avons prins deux doules [2] contères ches Argintins, cho fait qu’asteure in porrot bien juer eune trozy.inme mitan [3]. Pour cho faire, j’a queuji [4] un bon cassoulet.
Jou qu’os connichez ch’ cassoulet ? Ch’est un plot pour ches pitites gins cha n’est pont pour ches menhers [5] ed’ la haute. Ch’est un plot qui nous vient d’ches Romains épis d’ ches Espagnols qui féjèt’ent un ragoût ed mouton aveuc des fèv’. I faut dire qu’ padvant el’ quinzy.inme sièque n’y avot pont d’haricots in Espane, et incore moinsse à Rome, comme d’éffet ch’est ches werriers à bidets- ches conquistadors - qu’il ont ratriné [6] ch’l’haricot d’Amérique. Heureus’mmint pour eusses, Deubeuliou Bush i l’a pont seu [7]. I a tros villes qui dit’nt qu’ech cassoulet i est né natif ed lo : Castelnaudary, Toulouse, épis Carcassonne. Queumint qu’ cha s’fait qui n’o pos eune ed nous cuin [8] d’éch Nord, nouzautes étou [9] in récou [10] des lingots épis in élièfe des pourcheaux. In attindisse, ch’est Castelnaudary qui arrife padvant ches deux zautes pache qu’al est tout près d’ Issel ech villache qui fait ches cassoles (pont des castroles mes gins, attinsion dé’n’ pont vous berlurer [11]) qui donn’ent é leu nom à ch’ plot. Enne cassole ch’est enne plat’lète [12] qu’al arsânne [13] nous telle.
Peu qu’ manqué, toute il est fait pour nous berlurer, dins l’temps ch’étot ech plot qu’in appélot haricot (haricot d’ mouton cha n’est ti pont un resse d’ech temps lo), ches aricots in z’appélot des faviols épis après des fayots.
Curnonsky ech fameux cujènier, i avot truvé eune quatrième ville à cassoulet, ch’est Castannau.
Pour n’in définir, ches m’noules [14] al vient’ent ed chal char [15] qui faut mette enn.din ch’ plot, à Castelnaudary, ch’est du confit d’ojon [16] o bin core d’anette [17], à Toulouse i faut del potrène [18] ed pourcheau épis des saucisses ed là-bas, à Carcassonne ches des côtelettes ed pourcheau, épis à Castannau, ch’est l’ queue épis ches’ orelles salées ed pourcheau. Queumint qu’os allez queujir ches zaricots ? faut-y d’ches gros Tarbais o bin el fev’ moine, ch’est in gros haricot panchu ? I sânne à vir qui n’a qui vient’ent é-quère [19] lu zaricots dins nou pa.ys d’la Lys. Si qui lu faut des lingots dech’ Nord, qui qu’ ch’est les pus forts ? ch’est forchémint ches gins d’éch Nord.
I cachent incore des m’noules pou chal cracheà mète dins ch’ coué pou cujéner : faut -ti dal crache d’ojon o bin core dal crache d’anette, o bin dal crache ed’ pourcheau ? Pour faire cha bien i faut s’y prinde à l’avanche, pace ches zaricots i doètent é-trimper [20] lonmin (4 heures). Pour 6 gins i vous faut 700g d’ aricots, 300g ed’ travers ed’ pourcheau, la mitan d’enne andoule, chint grammes ed couennes, 400g ed confit d’ojon o bin d’anette, chint grammes ed crache d’ojon, chinq éclettes [21] d’al [22], deux chint grammes d’ognons, 150 g ed carottes, 1 clèw d’ giroffe, in bouquet garni, tros chint grammes ed’ saucisse ed’ toulouse, du conchintré ed tomates, sé, poife. Si in étot ed là-bas i faudrot ein pot in terre "ech l’oule" pou trimper ches zaricots, ichi os férez comme os pourrez.
Quand ches zaricots is ont bien trimpé, os allez élz équeumer [23] pis lzé mette à cuire tros quart d’heure à l’yow froéde, sans saler. Blanquir et rafraîchir ches couennes. Quand qu’ ches zaricots i bout’ent, faut équeumer. Mette ches couennes blanquies décopées in cupes ed deux chintimètes sur deux chintimètes, enne o bin deux éclettes d’al, ches carottes ech cleu ed giroffe, ech bouquet garni, ech travers ed pourcheau, ech l’andoule ed’ couenne, el potrène funquée ed pourcheau copée in gros lardons. Ech cuisache i dot aller duchemint, pour avoir ed zaricots cuits mais core fermes. In fin d’ech cuisache, assaïéz [24] et si qui faut mettez ein’ tit molé ed sé [25]. Mettez core enne cuillère al soupe ed conchintré ed tomates. Inlevez ch’ l’ognon pis jechtez l’lé.
Perdez chal "cassole" (enne telle ed là-bos si qu’os voulez), crinchez [26] l’ lé in’ndin aveuc ches éclettes d’al dépiautées [27]
(1 à 4 éclettes à vous d’ vire). Mettez ches couennes dins l’ fond. Mettez la mitan ed ches zaricots équeumés su ches couennes, pis chal potrène ed pourcheau in trinques [28], ches morciaux ed confit, armuchez [29] toute aveuc el resse ed ches zaricots, epis arrousez aveuc el ju d’ cuisache ed ches zaricots. Grillez chal saucisse ed Toulouse épis glichez ses morciaux aveuc des trinques ed saucisson ed couenne dins chl’ apprêtache [30]. Arrousez aveuc in molé d’ crache d’ojon o bin d’anette. enne crousse [31] dorée a s’fait padsus chal cassole.
I paraît qui faut querver [32] sept cops chal crousse (un cop tous ches dix minutes) à m’zure qu’al s’arfait, pour avoir un cassoulet parfait.
Pour intartnir ches m’noules i n’ n’a qui batèlent [33] sur combin d’cops qui faut ébarziller [34] chal crousse. Insaquez [35] dins ch’ four pour enne heure .
Bon appétit mes gins.
Edité le 16/08/05, révisé le 20/10/2007
Dziré (Ablain Saint Nazaire, 62)
[1] gobe d’éch glope : coupe du monde
[2] doule : rossée, ici défaite cuisante
[3] mitan : moitié ; notez bien que le match a trois moitiés
[4] queujir : choisir
[5] menher : monsieur, personne importante
[6] ratriner : ramener
[7] seu : su, part. passé
[8] cuin : coin, ici région
[9] étou : aussi
[10] récour : récolter
[11] berlurer : leurrer, tromper
[12] plat’lète : pièce de vaisselle
[13] arsanner : ressembler à
[14] m’noules : querelles
[15] char : chair, viande
[16] ojon : oie
[17] anette : canard
[18] potrène : poitrine
[19] quère : chercher
[20] trimper : tremper
[21] éclette : gousse
[22] al : ail
[23] équeumer : écumer
[24] assaïer : goûter
[25] sé : sel
[26] crincher : frotter
[27] dépiauter : peler
[28] trinque : tranche
[29] armucher : recouvrir
[30] apprêtache : préparation
[31] crousse : croüte
[32] querver : crever
[33] batiller : batailler
[34] ébarziller : casser, mettre en pièces
[35] insaquer : introduire