In in voèt des droles, énon, mes gins dins l’momint d’asteure. Vlo qu’elle smane padvant chelle-chile in o fait vnir ches gins d’éch quartier Cousinerie ed Villeneuve d’ Ascq à eune réunion pou leu d’minder si qu’in pourrot [1] pont mette quiques [2] vaques [3] dins leus agés [4]. Ch’est vré quoi, mette des bètes à cornes agües [5] dins eune ville à l’pointe d’ el tecnologie, cha devrot pont déparer [6] ch’ pa.ys-lo.
Dins ch’ quartier i resse quiques pièches [7] ed terre qu’al sont à ryé [8], ch’est lo qu’in veut mette des vaques. Cha s’rot eune occasion ed mette un molé [9] d’ ches camps [10] dins chal ville. Pis cha s’rot pou faire édz écolomies dsus ch’ l’argint public Ch’est des terres à chl’ acheuchonache [11] ed villes (Communauté Urbaine). Ches vaques a vont minger ch’ l’herpe, cho fait qu’in érot pus bzon [12] d’ fauquer [13] tros foès dins ch’ l’année. Ches sous d’ech fauquache i sront dépinsés pour autère cosse.
Cha queuminch’rot [14] au moé d’ maï pis cha s’arrèt’ro à l’ défénition [15]ed sétimpe [16] . In y tournrot [17] troès géniches [18], si qu’ ches gins i veutent-è bien.
N’y o eu eune vintan.ne ed gins qu’il ont vnu à l’ réunion. Pis il ont dit chou qu’i leu faijot avoir les freurs [19] :

« In vo chi éte mingé à chinchèles [20] pis à mouques [21],
 Vo chi n’y avoir un rude sintimint [22]
 Ches tiots i vont s’afoler [23] avec ech fil d’ercau [24].
 In s’in vo glicher dins ches bouzots [25] »

Margré toute ches gins il étètent bénaches ed pinser qu’i pourrètent vir troès vaques à l’ plache d’un bâtimint ed troès étaches.
Cho ch’est seur [26], seulmint, il ont pont pinsé eune buque [27] d’aller dminder à ches vaques si cha leu dui [28]ed vir passer tant d’ carettes [29], et pis core d’intinde si tant d’ potin [30].

Le 12/02/2008

Dziré (Ablain Saint Nazaire, 62)