« Mi, qui dijot padvant ch’ votache, j’ dis chou qu’éj fais, pis j’ fais chou qu’éj dis. » Awette, vlo qu’asteure i est in route à nous apprinte [1] queumint [2] qu’in fait du rade cangemint [3]. Ouais, ch’est saisichant, énon, mais in n’ o pos core eu l’temps d’és faire à ches rades rincontes [4], asteure faut suire [5] ches poulitiques qui faitent-é du rade cangemint.
El lundi in met in route un cangemint [6] , tertous i s’égueule [7] après, un sacun [8] i dit toute et pis l’aute i dit tout l’ contrèle [9], pis pour n’in définir [10], eune coupe [11] ed jours après, el vardi, in l’arcamuche [12], pis n’y o mie pus parsonne qui n’in palle !
Cho fait déjo un sapré copon d’ temps [13], qu’in fait comme cho, ch’est pour épruver [14]ches gins. Pétète, pétète...N’impêche asteure, il in font eune u bien deux tous les smân.nes ed ches annonches ed cangemint lo , ch’est des feultons à suire. Ej dis bien faut suire, do, pace si qu’os avez laiché passer in épisote os n’ savez pus du qu’il est ch’ cangemint.
In o eu ches éfants d’ CM2 qui z allètent faire parrain à un éfant d’él Shoah, ch’est roblié ;
ch rapport d’ Attali contère ches taxis ; ch’est épouré [15] ;
Jeorch-Marc Benamou à l’ Villa Médicis, foutu à l’ uche [16] ;
El carte famille nombreuse, queux dijajes [17] qu’in o eu lo, Sarkozy, Bussereau, Fillon, Morano, il ont minme dit à Pépy, ch’ maite ed ches qu’mins d’ fer, pou l’ premier coup qu’il avot du bénifice, qui dvot pa.yer à l’ plache d’ ch’ l’Etot.
Après cho, ch’étot l’tour à Roselyne Bachelot d’évnir nous faire l’artique [18] pou sin cangemint à elle :
El seurté d’ santey [19] a n’ récompinserot [20] pus ches éleunettes [21] pis ches élintiles [22]. Oh, a nous récompinsot déjo pos gramint, des mioches [23] à l’ léque-doégts [24].Cha srot à ches mutuelles ed pa.yer, vu qu’alz ont wardé [25] gramint d’ doupes. [26] Queulle agache [27], equ ch’est d’cho, ech wardage ed ches mutuelles i est dins ches règs pace i n’ doètent-é pont décesser [28] d’ récompinser si qu’i gn érot des pidémies. Cho ch’est d’el pure cacoule [29] !
Ouais, ches mutuelles ch’est nous porte.monnoé [30], ech governmint i n’o pont à vnir el y agriper [31]. Déjo qu’il o obligé ches malades à pa.yer ch’ l’aboulache in pertance. [32].
N’y o core eu ches annonches ed cangemint pou ches allocationsfamiliales qu’ech governmint i warde 138 myions pis qui dit n’ardonner 36 myions pour édier chres familes poves à warder lu jones. N’y o des mécantes langues qui d’mindent-é du qu’i s’in vont ches 102 myions qui déflutent [33].
Cho, ch’est du cangmint, in met toute à l’pile à l’ pale [34] pis pou définir n’y o arien qui cange.
Nouzautes étou in vorroét bien faire du rade cangemint dins nous vie, mais cha n’est mie si aju [35] qu’ cho.
In n’ peut pont s’ disvorcer el lundi pis s’armarier el judi, n’y o pétète un qu’i l’ l’o fait.
In n’ peut pont dire à sin patron qu’ch’est un grisar [36], el lundi, pis attinde qui vous mèche [37] du rinquère [38] dsus vous gagnache [39] el vardi [40].
In ne peut pont freumer [41] ch’ cassis [42] d’ télé à ches jon.nes el merkédi [43], pis in même temps leu d’minder si ch’est bien à s’ soir qu’i gn o chal nouvièle « star ».
Ch’est pour cho qu’i faut faire attinsion d’én pont ête journayer [44], u bien cangeard [45], seurtout si qu’os êtes à ch governmint.
I sanne à vir [46] qu’ « insanne toute i vienche impossipe ! »

Le 20/04/2008

Dziré (Ablain Saint Nazaire, 62)