A Saint-Pô, ech bourdi, ch’est ch’ prémier diminche ed Carême. Bourder ch’est aller dins ches gardins-frutiers, canter pis danser alintour ed ches peumiers in portant des torques ed palle alleumées.
El torque ed palle ch’est un bourbour u bien un boubour.
Pou lzé savoir pus longues dsus ch’ bourdi, faut racouter ch’ dikse liméro 1 d’ ches catrèw d’ fremions, ech morciau liméro 15, equ ch’est Ti-Fred qu’il o dvizé aveuc Sidonie d’ Watterdal pour es chronique qu’il avoèt aladon à Fréquence-Nord.
Sidonie in 1977 al avoèt 80 ans. Watterdal ch’est dins ch’ canton d’ Lumbres, cho fait qu’in est pus dins chl’ arrondichmint d’ Saint-Pô, alorse in dit « in avot » in plache d’ « in avoèt », pis « pont » in plache ed « poent ».

Ti-Fred : « Em mère a m’o dit qu’i gn avot eune tradition, ch’étot ch’ bos bourdi... »

Sidonie : « Ah ! ch’ bourdi ch’est l’Mardi Gras. Edvant, tous ches jônes i cachotent des bottes pour faire l’ bourdi... Si on n’ donnot pont d’ bottes, si on n’ faijot pont el’ bourdi, on n’avot pont d’ peumes... »

Ti-Fred : « El bourdi qu’est-ce que ch’étot ? »

Sidonie : « Bin, tous ches bottes qu’on avot ramasséye, on lz alleumot et i n’awot in fu jusqu’à ch’ garnier aussi haut qu’chel mason, dins ches camps la-bos à ch’ mont Cailleuet, vous mère a vous in o parlé d’ech mont Cailleuet, alle restot là, amon Toupiol, jusse au pied d’ech Mont Cailleuet.... »

Quelqu’un : « Et alors, on dansait autour du feu ? »

Sidonie : « Ah ben, non. I n’avot tout d’même des grands qui z y allotent, quiquefouos qu’i érot ieu dz éfants qui leuz érotent alleumés ! »

Ti-Fred : « Ça rappelle une religion du feu. Pourquoi faire le bourdi ? »

Sidonie : « Si on n’ faijot pont l’ bourdi, on n’avot pont d’peumes..
Mi, min vojin, ichi, qu’ ch’étot un vyux cantonnier, i sn allot pont à ch bourdi au Mont Cailleuet, ém’ mère à n’m érot pont laiché aller. I faijot bourdi dins s’patûre, pour avoir des peumes, i brûlot tros quate bottes comme cha. »

Ti-Fred : « Os dijez pour avoir des peumes, et qui qu’ ch’est qui donnot ches peumes ? »

Sidonie : « Ech Bon Dyu quoye, os n’y avez pont confiance ! »

Ti-Fred : « Ah ! Ah ! Ah ! »

Le 21/02/2010

Pour copie presque conforme

Dziré (Ablain Saint Nazaire, 62)