ROULEZ UREUX, ROULEZ COUQUÉS

lundi 27 février 2006
par  Dziré

Ech vélo-couqué, in dirot qu’il o été ingénié par Croquignol, Filochard, pis Ribouldingue, os s’ ramintuvez, ches Pieds Nickelés !

Allongé such cadot, ses pieds padvant, quiques chintimètes padzeur él cauchie, éch pédaleux in vélo-couqué, i dot méner ch’ l’ingyin aveuc éch guidon plaché padsous l’ selle, pis ch’ pédailler padvant él reule d’edvant, va-t-in vir !

In Allemane, in Hollande, pis au Danmark, n’ y o des dijan.nes éd myiers d’ jins qui s’in sertent, in franse ch’est quiques chintan.nes ed jins. In Urope déch Nord, éch vélo-couqué, il est pus aju, pus rade, pis moins amatichant.

Ch’est seurmint éch vélo d’edmayn. In vindeux d’éch vélo-chi i dit : ch’est él meyeux vélo pour varouler (randonner). Aveuc in molé d’aditance (accoutumance, apprentissage), in peut faire deux chint tilomètes par jour sans tro s’amatir, pach qu’il o in bon rindaje à cosse qu’in rinte gramin miux dins ch’ vint. Aveuc in parel vélo, in n’o pu mau a sin cul, a sin dos pis a ses bros. Aveuc eine caréne ch’est seur qu’ éch vélo-couqué, il érot d’ l’acou pour rouler in ville. Pour approuver éch vélo-couqué i vaut miux printe in enjyin aveuc in posture éd ménaje (position de conduite) pus hiaute équ pour cheux d’ varoulaje (randonnée). In peut printe "Spirit" d’amon HP Veloteknik (HP ch’est premlète pour Human Powered, dijons moteur humain in bon fransé), ch’est tout plein d’arsorts pour adoucher ches urtajes (amortir les chocs), ech pédailler y est daryère chal reule éd padvant, pis ch’ cadot i clène (est incliné) à quarante edgrés.

Margré qu’in diche qu’in n’ désapprind jamais à rouler a vélo, mi j’ vourros byin vous y vir padzeur in parel bétal ! Pou queumincher à rouler such chal longué-cayelle (chaise longue) à reules ch’est du ramonchlaje asseuré. Come in éfan qui queuminche, faut d’ l’ assistance pou avancher berlik-berlok sans quère. Après byin des ruses pou s’mette in route, vlo ty pon qu’éch guidon i vous armonte des nouvelles freurs. Chal direction al est tro elgère, si cha s’ treuve al tourne sot, in n’ peut mie l’arténir, édu qu’in vo s’n’ aller ? Ches bros i sertent ty a quite cosse ? Ch’est l’ minme félomèle qu’éch guidon a jointure (articulé) i seuche padzeur tin vinte, o bin qui seuche a ras d’tin cu. In a core plus éd freur du danjé aveuc ech vélo ed cauchie (route) Grasshopper (gra-père soteux, cri-cri, sauterelle) aveuc ses pitites reules (20 pouces, 50,8 cm) epis sin pédaillier dél tale d’ eine tourtière aveuc ses sochante dints. Quand qu’ in o aderché el drechage déch bétal-lo alorsse, ch’est des vagances à vélo, mes jins.


Portfolio

JPEG - 27.2 ko

Agenda

<<

2018

 

<<

Novembre

 

Aujourd’hui

LuMaMeJeVeSaDi
2930311234
567891011
12131415161718
19202122232425
262728293012
Aucun évènement à venir les 6 prochains mois

Brèves

contacter les rédacteurs

lundi 28 mars 2011

J’ai rchu quiques messaches invo.yés par ches lijeux. Jé lzé li, pis core j’ai poent pouillu rinfliquer pache vous messaches i sont invo.yés dins m’ boète à lette par ech manicraque. Pour mi savoir édu adercher l’ rinflique, fauroèt qu’os laichèches vou adrèche mail dins ch tesque d’ech messache.
Amiteuzmint
Dziré

Pour une réponse personnalisée à un contact avec un rédacteur, il est indispensable de laisser votre adresse mail dans le corps du message.