TINSION INSEUVEZ-VOUS L’ YOW AL VA VOUS ACOUVETER

samedi 4 mars 2006
par  Dziré

Ch’étot des prédijaj (prévision) éd flou (marée) éd tros mètes dich-set. Comme d’ effet, ches flous i z ont oché l’yow ed tros mètes trinte chinq. Cha s’ a pasey in janvier deux mil sich à Tuvalu eine pugnie d’iles dins l’ ochéan Pachifique. El pus hiaute plache d’éch caplet d’iles-lo al est à quate mète chinquante padzeur chal mér. Ch’est pon gramin. El sman.ne passey i z ont eu des flou moins hiaut équ ches prédijaj ed temps (météo). Edpis él queuminchmint déch vinti.in.me sièque, el yow d’ ches mers qu’al armonte éd vint-chinq chintimètes. Tuvalu ch’est in pitit pa.ys indépindant qui est acheuchoné aveuc esz inglé dins ch’ "l’amasse à tertous" (Commonwealth). Ches dérijeux éd Tuvalu i z ont dmindé à ches Australiens pis a ches Nouviaux-Zélandais d’archuvoir pis d’ mette au rados ches jins qui s’aprètent à tête ches prumiers arfujiés écologiques. Ches Australiens, ches pus babaches dins ches jins qui pallent inglé, i z ont rinfliqué qu’ chal montée d’ ches yows ch’est pon vré, n’y o pon eine buque éd preuf.
Sont-y vrémint suptils ches Australiens, pour eusses ch’est putot chal tere qu’al s’intique dins l’ yow, à cosse qu’y a tro d’ jins such l’île, pis pache qu’in o fait d’ tro d’ cauchies pis d’ tro d’ masons. Ches dérijeux éd Tuvalu, i pinsent-è asiné ches Australiens pis éz Américains padvant ches tribunas pache qui z ont pon voulu mette leu signure in-bos déch contro d’ Kyoto conter chal pollution. Ches Tuvaliens i veutent-è dénoncher ches mordreux (criminels) qui laichent imbrenner ch’ l’air aveuc ches gaz éd leuz uzines. Achteure in s’in vo no.yier des jins aveuc ech récauffaje déch climat. Ches jergonajes i vont core duré in copon d’ temps, pis ches glaches qu’al freintent frinknal cha vo racouvter ches dijajes à tertous.
Ches américains qui milent à l’ banquisse i content ches sillonées d’yow arvénues dél freinte éd glache ach Groenland. Edpis ch’ l’aney deux mille ches glachiers dél bon.ne déch Nord (pôle Nord vu comme une borne) i z ont surwidié deux fos pusse éd glache dins ch’ l’ ochéan. Tous ches vyux prédijajes i n’ sont pu bons asteure, i faut n’arfaire des nouvyows in prindant model such chal freinte d’ojordui. Si qu’in fait freinte el colinette (calotte) ed glache déch Groenland alorse él yow d’ ches mers al vo armonter éd set mètes. Faudra byen és mette in pasture éd bouter au rados ches jins qui ressent à Tuvalu, pis dins ches tiotes iles. In érot lo ches prumiers récapés déch climat.
Ch’est eine affaire qu’al o actionné ech canteux Kent qu’il o fait eine binde à dessins "A l’eau la Terre" (a l’ yow chal tère) pour équ ches jones d’asteur is faichent attinsion équ leuz aditances ed tous les jours cha n’ porte pon intérêt ach glope, in n’ armettant padzeur éch réchauffaje climatique.
In o eine istoire à Tuvalu aveuc eine tiote file Mamaua, tandisse qu’ a Paris n’y o eine aute istoire aveuc in garchon du minme ache. Tuvalu il est in véanj d’ête el prumier pa.ys a t-ête racouvté par éch l’ armontée dél yow dez ochéans, pis Mamaua al vo t-ête dins ches prumiers récapés climatiques.
Ech life i conte él vie éd tous les jours. Hugo i arfreume él broque (robinet) tandis qui bruche ses dints, Mamaua al s’ lafe padzous l’ nochère padvant d’ aller donner éch boire à ches pourchaux. Hugo i pauche eine peume d’oranje (presse une orange), pis il incorse eine tarteine éd confiture, il a pus quére cha qu’ ches pitites boutèles éd yaourt à boire, pis ches portions d’ blanques z-éteules (céréales) dins lu pitits saclés (sachets individuels). Mamaua al minje ches fruits déch l’ape à broute (arbre à pain), pis al bot du jus éd gogue éd coco. Chacun a s’ mote i nous frotent accroire qui font attinsion dén’ pon d’ tro polluer. Awette va, Mamaua al amoutre a Hugo éch darnier DVD d’ Harry Potter, pis al dit qu’al a jechté ech lijeux ed binde a z-imaches (magnétoscope). "Jechté, mais du qu’ t’es l’o jechté ?" qui li dit Hugo. Eh ben, n’y o quand minme eine cafuterie a Tuvalu édu qu’in jette a l’ pile à l’ pale des carettes des carculateurs, des téléphones portapes. A Tuvalu aussi éch l’ abitute du jechtape al est in train éd pourrir chal vie. Chal binde à dessins-lo ch’est come si qu’in sonnot dz appyows pour eine abolition a vnir. L’ yow al monte pis ch sé i impoésone chal tère. Ech life "A l’eau la Terre" i est déssaqué aveuc l’aidyance éd l’ ADEME pis d’ l’ acheuchonaje Alofa Tuvalu.


Agenda

<<

2018

 

<<

Octobre

 

Aujourd’hui

LuMaMeJeVeSaDi
1234567
891011121314
15161718192021
22232425262728
2930311234
Aucun évènement à venir les 6 prochains mois

Brèves

contacter les rédacteurs

lundi 28 mars 2011

J’ai rchu quiques messaches invo.yés par ches lijeux. Jé lzé li, pis core j’ai poent pouillu rinfliquer pache vous messaches i sont invo.yés dins m’ boète à lette par ech manicraque. Pour mi savoir édu adercher l’ rinflique, fauroèt qu’os laichèches vou adrèche mail dins ch tesque d’ech messache.
Amiteuzmint
Dziré

Pour une réponse personnalisée à un contact avec un rédacteur, il est indispensable de laisser votre adresse mail dans le corps du message.