MAIS SI QU’ECH TEMPS I FAIT QUITE COSSE A CH’ L’AFFAIRE

journal électronique
samedi 4 mars 2006
par  Dziré

Lire és gazette à l’ coïette [1] in tnant és gobe [2] éd café dins s’ mayn, cha ch’est fin bon, énon ? Ben cha sra bétot pus possipe pache qu’in vo nous canjer ches gazettes pou lzé rimplacher par des jornals ektroniques. I veutent nous aditer [3] à eune gazette qu’al érot ses informations arquinquées [4] à tnure [5], Aïdon ! Fini ches photos, in pourro miler edz imajes qu’al boujent-e. In pourrot lire in dvisaje pis core él l’acouter. Ch’est surprindant, énon ? Qui qu’ ch’est qu’il o byen pu rubriquer eune parèle affaire ? Ben ..., ch’est ches Belges. Ches lijeux dèl gazette "Tijd" cha veut dire éch Temps, i z éront lu nouvelles dsus du papier ektronique. Ech nouviau jornal ch’est in minme temps du papier pis in plot cassis [6]. Pindant deux mos deux chint lijeux distingués [7] is pourront épruvoir [8] in détal ech Tijd ektronique. In n’peut pon core él ploy.ier pis pont l’ chiffoner. Tous ches pajes dech jornal, alz s’ lijent-è dsu in plot-cassis éd seize chintimètes sus vint-deux chintimètes, al sont lijabes come si qu’al sérètent-è pauchées su du papier. In poche in bouton pour tourner ches pajes. In pourra aussi fin bénache querquer d lon [9] dsus ch l’intarnète édz artiques arquinqués. N’ y o djo deux ans qu’ éch l’ interprinsse hollandaisse iRex-Technologies travalle pou faire eune méquenne ed lijaje portabe pour ches jornals. Pour cho il leuz o follu prinde éch l’attache [10] éd E-Ink [11] eune interprinsse américaine. Chal trame d’ech papier ektronique d’ E-Ink ch’est al cantourne éd chinq chint mile platè-boulettes [12] for nénènes [13]. Dins chaque platè-boulette n’y o des buquelettes [14] noirtés pis blanques querquées d’ektrichité. Byin seur, pour ches buquelettes el querque plusse ch’est l’ couleur blanque, pis l’ couleur noirte ch’est l’ querque moins. In mettant ches platé-boulettes au courant ektrique, ches buquelettes as déplachent-è dins l’ boulette a cosse dél polaritey ektrique chou qui fait qu’ ches platé-boulettes al printent el couleur, blanque o bin noire. Chaque platè-boulette ch’est cinsémint in point dins l’ paje. Aveuc ches platè-boulettes i sont fin aches pour eusses faire des lettes et pis dz imaches. Chal couleur dél platè-boulette al resse quiques minutes après qu’in euche copé ch’ courant ektrique. Ches cristo yoïches [15] i leu faut in surjeon [16] éd leumière in plusse déch courant, pour eusses faire éd l’attache [17], tandisse qu’ éch l’ inque ektronique i n’ li faut fauqu’ du courant, ch’est là sin benifice [18]. Ech l’attache à l’inque ektronique al est lisipe dins tous chez angues, cha ch’est core pus fort. Ech jornal ektronique i peut plaquer seize équéyons [19] éd gris. Aveuc quate chint points d’imaches par chintimète carré in o él min.me allures [20] qu’aveuc in vré jornal. Ech jornal ektronique i est vrémin plot, i est in molé pus fin equ du vré papier. Pour él momint d’asteure, in n’ peut pon l’ ployier, pis pon l’ chiffoner. In n’ peut pon non pus el torde a cosse ech ches quiques piéches ektriques pis ektroniques pour el faire aller. I li faut eune solite boite éd deux chintimètes d’épaisseur pour placher ech ramintuvoir [21], ech carculeux [22], éch clapoir [23], chal batry, pis ch’ l’arloyeux [24] pour s’ abreuver à in ordinateur. In plus in pourro ravizer des lives pis des papiers d’ sin traval, t’as qu’à vir ! Ech plot cassis i est pochape [25] aveuc in flicron [26], comme cha in peut aussi écrire, quoi qu’ té vorroés d’ miux ! In peut minme warder ches écrivures pindant in mos, trinte lifes ektroniques o bin tou l’ gazette ed trinte jours. Asteur, n’y o pétète pon qu’ des bénifices. Pinsez in molé, i faut faire freinde [27] ches écrivures pour elz intiquer dins l’ farnète déch cassis, chou qui fait qu’él paje al est moins lisipe. Padvant in cassis in n’ peut mie lire in diagonale, suire d ésn oeul ches tites, ches lines pis core ches étiqués [28], comme in l’o toudis fait aveuc él gazette in papier. Eune rade attache [29] d’imajes éd mouvmints, pis d’ photografes in couleurs, cha n’ va pon core. Si qu’os avez in molé d’ passyinche bétot os érez un jornal padsus in cassis ployape, imbelli aveuc edz afileys d’images [30] pis arquinqué tous lz heures.
Le 04/03/2006
Dziré (Ablain Saint Nazaire, 62)


[1à l’ coïette : tranquillement

[2gobe : tasse, bol

[3aditer : habituer

[4arquinquées : mises à jour

[5à tnure : en continu

[6plot cassis : écran plat

[7distingués : sélectionnés

[8épruvoir : essayer

[9querquer d’ lon : télécharger

[10attache : système d’affichage, vient de billet d’attache affiche

[11E-Ink = inque ektronique : encre électronique

[12platé-boulettes : capsules

[13nénènes : minuscules

[14buquelette : particule

[15cristo yoïches : cristaux liquides

[16surjeon : source

[17attache : affichaje

[18bénifice :avantage

[19équéyons : tons, niveaux

[20allure : apparence, résolution

[21ramintuvoir : mémoires

[22carculeux : microprocesseur

[23clapoir : haut-parleur

[24arloyeux : carte réseau

[25cassis pochape :écran tactile

[26flicron : stylet

[27freindre : réduire

[28étiqué :exergue

[29rade attache : affichage rapide

[30affiley d’images : video


Agenda

<<

2018

 

<<

Septembre

 

Aujourd’hui

LuMaMeJeVeSaDi
272829303112
3456789
10111213141516
17181920212223
24252627282930
Aucun évènement à venir les 6 prochains mois

Brèves

contacter les rédacteurs

lundi 28 mars 2011

J’ai rchu quiques messaches invo.yés par ches lijeux. Jé lzé li, pis core j’ai poent pouillu rinfliquer pache vous messaches i sont invo.yés dins m’ boète à lette par ech manicraque. Pour mi savoir édu adercher l’ rinflique, fauroèt qu’os laichèches vou adrèche mail dins ch tesque d’ech messache.
Amiteuzmint
Dziré

Pour une réponse personnalisée à un contact avec un rédacteur, il est indispensable de laisser votre adresse mail dans le corps du message.