GROSSES VARZELLES RIMPLITENT GRAMINT D’FUMELLES !

de gros testicules servent beaucoup de femelles !
jeudi 11 novembre 2010
par  Dziré

Chés inglès i n’in faittent-é des caches pis dz arcaches [1] ! Ch’est fin farce [2], énon ?
A none [3] aujourd’hui (10/11/2010), il ont dessaqué [4] eune nouvelle à n’in quère [5] sin cul dins l’ cuvelle [6] !
Nom des os ! Taijez-vous mes gins, ch’est eune sorte ed grand-père sauteux [7] , savez un crinchon gris, [8] qu’il o les pus grosses varzelles [9], à l’av’nant [10] d’es talle [11]. Ed sin nom « decticelle côtière » in fransé pis « platycleis affinis » in latin, ech grand-père sauteux qu’il o eu ch’ prime [12] à ch concours, i o des varzelles qu’al pèsent-é 14 du chint [13]ed sin poeds. Récomparé à [14] un homme ed 70 kg cho fait 9,8 kg à rinfreumer dins sin caneçon. T’as qu’à vir !
« Increuyape !, Estraordinaire ! » qui dijoètent ches cacheux [15]. Des coules [16] d’eune parèle talle, cho prind tout l’ plache dins l’panche [17] d’echt’inje [18] ed grand-père sauteux.
Ches cacheux inglés,il ont récomparé 20 injes ed grand-pères sauteux. El decticelle triulée [19] aveuc des varzelles ed 2.7 mg pou l’coupe [20] a n’ peut mie ténir carrure à [21] l’ decticelle côtière qu’fauqu’eune coule [22] al pèse 70mg.
Peu qu’manqué, aveuc ses varzelles comme des chiternes [23], ch’ paure insek i n’ sait poent faire plus de sminche quanqu’il anoque [24] eune fumelle [25], au contrèle ed ches regs habituelles ed canjmint [26]d’ches espèces.
Tant pus qu’elle fumelle alle est bistanlère [27], tant pus qu’ ches varzelles ed ches marles [28] i sont grosses.
Cho fait qu’ech marle qui fait plus d’esminche, il o plus ed chance d’anoquer l’ fumelle pis d’ passer sin matriau [29] génétique.
Eune decticelle cotière, equ ch’est un grand-père sauteux couilleux, cho n’suit pos challe règ chi.
El fumelle decticelle alle s’ laiche coquer [30] aveuc à l’ cantourne ed [31] 23 marles dins les deux moès d’es vie adulte.
Eh ben, taijez-vous, ches marles chi aveuc leu varzelles comme des chiternes, il ont un moindère rindage [32] in sminche à chaque équichage [33].

Ches cacheux il ont déduit d’ leu étute, equ ches grosses coules, d’chelle sorte-lo d’grands-pères sauteux, ch’est pour qui peuchent-é [34] anoquer eune faflée [35] d’ fumelles sans bouler court [36] d’esminche.
Si qu’os volez lzé savoir pus longues [37] faut qu’os lijèches [38] ech jornal d’el « Royal Society ».
Suppoz qu’os n’êtes pus nouviaux d’ [39] el biloute [40] el pus longue ed la terre du monte dins ches bêtes. Os savez tertous equ ch’est l’ puche [41] qu’al o sin barliquot [42] d’un quart d’es talle. Achteure, os savez in plus equ pou ches varzelles ch’est du côté à grand-père sauteux qu’i faut ravizer [43]

Le 10/11/2010

(Ablain Saint Nazaire, 62)


[1des caches pis dz arcaches : des recherches approfondies

[2farce : curieux

[3none : midi

[4déssaqué : litt. sorti du sac, publié

[5quère : tomber

[6cuvelle : baquet à lessive, petite cuve

[7grand-père sauteux : sauterelle

[8crinchon gris : petite sauterelle d’un gris noirâtre

[9varzelles : f.pl, testicules

[10à l’av’nant de : proportionnellement à

[11talle : taille

[12avoir ech prime : recevoir le premier prix

[1314 du chint : 14%

[14récomparé à : en comparaison

[15cacheux : chercheur

[16coule : testicule, couille

[17panche : panse, abdomen

[18inje : race

[19triulée : bariolée

[20eune coupe : une paire

[21ténir carrure : résister à

[22qu’fauqu’eune coule : dont un seul testicule

[23chiterne : citerne

[24anoquer : pour un champ ensemencer, ici fig. féconder

[25fumelle : femelle

[26canjmint : évolution

[27bistanlère : coureuse, volage, infidèle

[28marle : mâle

[29matriau : matériel

[30coquer : copuler pour le mâle ; alle s’laiche coquer : elle se fait couvrir ou plus familièrement « sauter »

[31à l’ cantourne d’ : environ

[32rindage : production

[33équichage : éjaculation

[34peuchent-é : subjonctif, puissent

[35faflée : grande quantité, grand nombre

[36bouler court : venir à manquer de, n’avoir plus assez de

[37lzé savoir pus longues : en savoir plus, approfondir

[38qu’os lijèches : que vous lisiez

[39n’pus ête nouviau d’ : être au courant de

[40biloute : sexe masculin, pénis

[41puche : puce

[42barliquot : pénis

[43ravizer : regarder


Agenda

<<

2018

 

<<

Avril

 

Aujourd’hui

LuMaMeJeVeSaDi
2627282930311
2345678
9101112131415
16171819202122
23242526272829
30123456
Aucun évènement à venir les 6 prochains mois

Brèves

contacter les rédacteurs

lundi 28 mars 2011

J’ai rchu quiques messaches invo.yés par ches lijeux. Jé lzé li, pis core j’ai poent pouillu rinfliquer pache vous messaches i sont invo.yés dins m’ boète à lette par ech manicraque. Pour mi savoir édu adercher l’ rinflique, fauroèt qu’os laichèches vou adrèche mail dins ch tesque d’ech messache.
Amiteuzmint
Dziré

Pour une réponse personnalisée à un contact avec un rédacteur, il est indispensable de laisser votre adresse mail dans le corps du message.