FAUT PON VOUS FOUTE ED NOUS POIRES !

lundi 6 mars 2006
par  Dziré

El fondante Molin d’ Lille éd 1858, el burré d’Eperleques éd 1870, el trionfe éd Ronchin 1900, os zé connichez-ty ? A m’ mot’ équ non. Ches des sortes éd poires qu’in treuve dins ches wardeuw frutyé dél région. Tous ches sortes éd poires d’ adon os pouillez lzé rpiquer dins vous gardins dins l’ région, ch’ est d’ nous trèl, énon ?
N’y o eine bonne intinte intar ches wardeuw frutyés (vergers conservatoires) éd ches deux coteys dél lisse (limite, frontière) el Wallonie d’in cotey pis nouzautes, él Région Nord-Pas-de Calais éd l’aut cotey.
Ech wardeuw frutyé déch chinte agronomique éd Gembloux, pis chti éd Villeneuve d’ Ascq i travallent-e insanne pour eusses récaper des poires bourjoises pis des sinsières(paysannes). Ches deux wardeuw frutyé iz artreuvent des sortes d’adon (variétés anciennes), in leu féjant gramin attinsion.
In Belgique quater vint neuf du chint éd ches poires al vientent-è dél sorte Conférence, qu’al o été arrinjée intar él Doyenné du Comice (1871) pis Durondeau qu’in o fait in Wallonie in 1850, mais chal chil al prind abile, el fu bactéryen. Bon Chrétien William ch’est l’ plus arnommée. Dins ches sortes éd poiriers-lo i n’ n’o qui z’ attrapent el tavlure. El tavlure ch’est eine maladie qu’in arconnot a des noirté taques dsus ches feules pis ches fruits pis des quervures (crevasse) dins ches fruits. Ch’est eine sécamin éd vyèles sortes qu’in a laiché disparaite. Ches sortes éd poires les pus durtes à l’ maladie, al sont toudis core là. N’y o des sortes qu’al z-ont deux chint zans !
Al vyintent éd ches démucheux (obtenteur) déch dij-neuviinme sièque o bin éd ches sinsiers. Laichés, sans s’én’ n’ occuper, ches poiriers intiqués(planté) padvant chal guère i z ont pon attrapé él tavlure. El poire-rinette (poire-reinette) éd ches biaux-jours al est n’din. Al vient pitite pis rouche dsus in ape a z épènes qui arsanne à ch poirier sauvache. Dins ches poires sinsières ch’est chal Saint Mathiu qu’al est in-tête. Al tyint (résiste) à toute. Ch’est eine poire pour cuizaje (à cuire). Ch’est pache qui fallot minger dins ches courts-jours, qu’in a intiqué des poires pour cuizaje . In pouvot lzé wardé for lonmin, al ténotent byin conter ches maladies, pis al conservotent byin sans manicraque pour faire du frod. Al s’ wardent quiques mos dins in pièche fraiche. Asteur, ch’est toudis vré. Dins ches pus bon.nes n’y o l’ Saint Mathiu. Dins ches patures, ches apes à poires Saint Mathiu in z’arconnot éd lon. Iz ont pein d’ vigueur pis des branques arquéyantes. Ech l’ape i est méné (conduit) in hiaute tije. Come in dit ch’est in ape in playn vint, in li fait pon des tales réguyères, et in prindant sin temps i vo t-ête grand, faut laicher set mètes intar deuxc apes.
Ch poirier-lo i print sin temps pour don.ner ches fruits. Mais a mzure, in o éd pus in pus d’ fruits à warder. El Saint Mathiu al est fin bon.ne in poire à conserve, (confite).Ch’est come dél poire au chirop, mais a l’ plache dél yow t’es met du vinègue. Ches poires al sont meures alintour du vint éd sectembe al Saint Mathiu. Si qu’al est mis au rados dins eine pièche fraiche pis aerée, alorse chal poire t’es peux l’ warder dusqu’in janvier éd l’aney d’après. I n’o gramin d’ sortes ed poirier, in n’ peut mie ichi lzé lommer tartoutes.
Cul frisé : poire pour cuizaje al vyint éd Thiérache, faut l’ arcueiller au queuminchmint d’octope, pis al est meure dins ches courts jours.
Marie-Louise : poire à coutiau , faut l’ cueiller au mois d’ sectembe pis al est meure in octobe-novembe
El poire-peume a coutiau pis à cuire al est pon d’tro durte (mi-fondante) al o du jus pis al est in molé aplatie. Al est durte à ches maladies, in l’ cueule in octope, pis al est meure in octope-novimbe.
El plovine, ch’est eine pitite poire rousse a cuire au chirop.
El grosse louise , ch’est eine sorte qu’al est durte a ches maladies. Ches fruits i z ont eine couleur vert-gaune, pon d’ tro gros, pis i sont meurs in sectembe.
Ch’est ch Consèl Régiona qu’il o mis in plache éch Chinte Régiona d’ aRsources Génétiques (Centre Régional de Ressources Génétiques), qui intartient ches wardeuw frutyé. I conservent-è dins leu wardeuw frutyé a l’ cantourn ed mil sortes ed peumes, tros chints sortes éd poires pis deux chints chinquante chrijiers, tertous éd nous région Nord-Pas de Calais. In peut s’ défuler (se décoiffer) pour leu dire marci.


Après-écrivure :
Poire Saint Mathiu dins ch’ four :
Ingardyins : des poires in molé d’yow, dél castonade.
Cuizaje eine heure, dins ch’ four, gauje (thermostat) : 6/7

Dins in plot a four mettez in fond d’yow (deux chintimètes) armettez padzeur eine cuyère à café éd castonade par poire a cuire. Copez l’cul d’ ches poires pour qu’éch chirop, i rinte dins l’ poire par és’ n’in-bos. Boutez ches poires dins ch plot sins inlever ches plates ni ch’ trognon, laichez cuire dins ch four eine heure aveuc el gauge à sich-set pour faire dins les deux chints edgrés.

Poire Saint Mathiu au chirop :
Ingardyins : poires, chuque in morsyow, dél yow
Cuizaje eine heure à fu douche.

Aplachez ches poires sans artirer ches plates dins eine castrole aveuc assez d’yow pour elz armucher. Laichez cuire à fu douche pindant eine heure sans mette éd couvlèche. In tiot molé avant chal définition dech cuizaje armettez padzeur in morsyow d’ chuque pour eine poire dins l’ castrole.

Poire Saint Mathiu éd longue warde (confite) :
Ingardyins : deux kilos pis eine mitan éd poires, in kilo d’ chuque, la mitan d’in lite ed vinègue éd vin.
Cuizaje quate heures à fu douche.

Artirez ches plates éd ches poires in laichant chal queue. Aplachez zé dins in coué aveuc ech chuque pis ch’ vinègue. Laichez cuire deux heures a fu douche aveuc éch couvlèche, pis core deux heures sans ch’ couvlèche.
Mettez dins des bocaux sans estérilizer. Ches poires éd warde al peutent rester dins ch’ bocaux pindant deux ans.


Agenda

<<

2018

 

<<

Octobre

 

Aujourd’hui

LuMaMeJeVeSaDi
1234567
891011121314
15161718192021
22232425262728
2930311234
Aucun évènement à venir les 6 prochains mois

Brèves

contacter les rédacteurs

lundi 28 mars 2011

J’ai rchu quiques messaches invo.yés par ches lijeux. Jé lzé li, pis core j’ai poent pouillu rinfliquer pache vous messaches i sont invo.yés dins m’ boète à lette par ech manicraque. Pour mi savoir édu adercher l’ rinflique, fauroèt qu’os laichèches vou adrèche mail dins ch tesque d’ech messache.
Amiteuzmint
Dziré

Pour une réponse personnalisée à un contact avec un rédacteur, il est indispensable de laisser votre adresse mail dans le corps du message.