NETTIAJE D’INJE

vendredi 10 mars 2006
par  Dziré

Ches écologisses i nous content équ ch’est byow la Nature. Awette va i s’in passe des droles. Taijez-vous, chal chi al arrive in Ingletère : bétot ches inglés is n’éront pus leuz écureuls rous. Os rindez-ty conte ? Tous ches tiots inglés qu’in o incleumi (endormis) in leu contant ech l’ Ecureul Nojette (Squirrel Nutkin), in n’ peut mie lzé conter tellmint qui sont énumérapes (innombrables). Ch’est eine istoire aveuc edz imaches ed Béatrix Potter qu’al o écrit in mil neu chint tros. Si qu’ech l’estynction éd ches écureuls rous al arrivrot, cha srot comme si qu’in artirot in morsyow éd lu jone temps a ches inglés. I z ont mis d’ cotey in myion éd lives esterleins (ch’est ches doupes inglés) pour eusses faire des wardeux (réserves) d’écureuls rous édu qu’éch l’écureul gris i n’ o pos l’ drot dél y aller. Pis si qu’éch l’écureul gris il y vo, cha sra tant pire pour li . Ch’est que margré leu amour pour ches biètes éz inglés i vont té l’ escoffier (tuer), ch’ l’ ardi gris-lo.
Dins ches wardeux, in s’in vo faire in apar (logement réservé) pour ches écureul rous. Si qu’in treuve in écureul gris dins ch’ trèl (territoire) wardé pour ches rous in vo li foute in cop d’ fusique o bin él mette dins in sa pis l’ asniquer d’un cop d’ machuque daryère és caboche. Adon dz écureuls rous i n’ avot tout partout in Ingletère, asteur i n’in resse pu fauqu’ vin-mil t’as qu’ a vir ! Pindant ch’ temps-lo ches écureuls gris i gan.nent-è dél plache pis i sont core pus d’ deux myions.
Ch’est in rute batillache (combat), plon d’ hin.ne (haine) pis d’in molé d’ injime (racisme) : ches rous contère ches gris, ches pitits (in rous cha pèse tros chints grammes) contère ches gros (in gris cha pèse eine live éd chinq chint grammes), ches écureuls d’ichi contère ches écureuls invahicheux ; pour n’in définir és Inglés contère ches étranjés. Comme d’effet, ch’est eine inje éd rongueux qu’al impéque eine aute inje éd rongueux ed vive. N’y o eine sécamin éd gardins duqu’ ches écureuls i vyintent-è minjé dins l’ mayn éd ches on.mes. Cha peut-ête des boulettes (bonbons) o byin des grayns éd tournosolé (graines de tournesol) pis édz aricots-cacawette (cachuètes). Ch’est vrémin eine belle biète, mais si qu’in ravize ses grows (griffes) pis ses lons dints in s’apinse équ ch’est fin byin d’és déméfier.
Ech l’abolition d’ ches écureuls rous, al queuminche in mil huit chint sochante seije, quanqu’in jin byin calé il o ch’ l’ idey éd faire vnir d’ Amérique eine coupe (couple) d’écureuls gris. In mil neu chint trinte, i n’ n’avo djo tellmint qu’in lz o mis dins ches biètes nuisipes. Aprè chal guère in a don.né quiques sous pour eine queue d’écureul gris pour énorter ches jins à lzé escoffier. In a core mis in route quiques z autes approuvajes (tentatives) éd z é débla.yer (s’en débarrasser). N’y o mie aryen qu’il o aderché (réussi). N y o core chint mil écureuls rous dins ches bos d’ chapins in Ecosse, pis n’y o deux zîles édu qu’éch l’écureul rous n’o pon a s’ahouper aveuc éch l’écureul gris.
Ches wardeux, i sront dins ches bos d’ chapins, aveuc alintour édz ajés (environs) sur eine avandeur (profondeur) éd quate chinq kilomètes. Dins ches ajés i n’y érot pon d’ quènes (chênes) pis pon d’ fows (hètres), pis éz autes zapes qui pertent-è leu feules à ches courts jours ; tous ches fruits éd ches apes-lo, ch’est l’ warde-minjé éd ches écureuls gris. Si dins ches ajés déch wardeux in treuve in écureul gris , ben i s’in vo t-ète escoffié. In o acaté des trappettes (piège) à z écureul, qu’éch l’uche (porte) al s’arfreume par daryére éch l’écureul. In déquerque él trappette dins ch’ ingeulée (ouverture) dins sa (sac), pis quanqu’il est dins ch’ sa in l’y arlouque (assèner) in cop daryère és nèque (cou) !. Ch’est core cha qui li fait él moins d’ mo. In n’o pos core eu mèche éd faire eine pilure (pilule contraceptive) pour ches écureuls gris, pis faut aller si abile qu’in n’ peut pon attinde. N’y djo lonmin qu’in cache à comprinde pourquo équ ches écureuls rous i défunctent à glave. Asteur in o truvé deux rézons : el prumière ch’est qu’éch l’écureul gris i minje gramin d’ plusse pis padvant lz autes. I minjent-è ches noué d’ quène (gland) tandisse qu’ al sont core vertes. Ech l’écureul rous, li, il attind qu ches noué d’ quène al seuchent-è meures. Quanqu’i pourroué lzé minjé, ben i est d’ lèque, i n’in resse pus ch’ gris i o tout corporé. El duzi.in.me rezon ch’est qu’éch l’écureul gris i carrie (est porteur) ches poquettes d’écureul (variole de l’écureuil). Ech l’écureul rous il est rudmint aflijé (bléssé), i o edz ulcères, des san.nmints, des influres éd char (tuméfactions), édz afolures éd pyow, pis des guilajes (suintements) a s’ bouque, ses pattes, pis ses affaires, el trognère pour eine fumelle, pis l’ quéquette pour in marle (organes génitaux). Quin jours après el queuminchmint d’ és maladie éch l’écureul rous, i est défuncté. El pus rédeux ch’est qu’éch carrieux i n’est pon malate pis qu’in sait pon eine buque queumint qu’él maladie al passe éd ches gris à ches rous. Ches écureuls gris i sont in route à faire du nettiaje d’inje contère ches écureuls rous. In plusse, i sont for mécants aveuc ches oujeaux, mettons qu’in écureul gris i démoli seulmint deux nitées par an aveuc chinq ués o bin chinq pitits oujows, cha fait eine estinction éd vint myions d’oujows. Ech l’écureul gris il est arnommé pour li esquinter ches apes pis ches plantes. Il minje ech l’écorche éd ches apes pour li s’ pourlèquer dél sève chuqurée. Pour él zé débla.yer, os pouillez prinde vous carabeine, aplacher vous atrapes (piège), vous sos (sacs), pis vous machuque (massue,gourdin).

(*) Nettiaje d’inje : nettoyage ethnique



Agenda

<<

2018

 

<<

Septembre

 

Aujourd’hui

LuMaMeJeVeSaDi
272829303112
3456789
10111213141516
17181920212223
24252627282930
Aucun évènement à venir les 6 prochains mois

Brèves

contacter les rédacteurs

lundi 28 mars 2011

J’ai rchu quiques messaches invo.yés par ches lijeux. Jé lzé li, pis core j’ai poent pouillu rinfliquer pache vous messaches i sont invo.yés dins m’ boète à lette par ech manicraque. Pour mi savoir édu adercher l’ rinflique, fauroèt qu’os laichèches vou adrèche mail dins ch tesque d’ech messache.
Amiteuzmint
Dziré

Pour une réponse personnalisée à un contact avec un rédacteur, il est indispensable de laisser votre adresse mail dans le corps du message.