D’EL MAUVAISETÉ DINS L’ TNT
par
TNT : i m’ sân.ne à vir equ cho veut dire : Tind’rie [1] à Niches [2] pa l’ Télé. Quanqu’il ont mis l’ TNT dins nou pa.ys, à Ronchin, os ons acaté eune boète-déméloir [3] à chl ypermarqué « Dinchécan [4] ». Ch’étoèt un « Métronix » à deux voès [5] pour mi ravizer [6] eune cân.ne [7] pis pouilloir [8] én n’arcopier [9] eune aute. Après l’définition [10] d’el warantie, el boète al quet in raque [11] pis al toulle [12] tous ches cân.nes ed tardiole [13] pis d’ télé. Ej’ m’arvos [14] à ch boutique [15] pour mi faire déraquer [16] min manicraque [17]. Lo, in m’asplique equ ch’est pus quère [18] ed radiabler [19] chelle vièle boète-déméloir équ’d’én n’acater eune nouvièle. Pou ch déraquage os n’ n’érez pou sochante dij uros intandis qu’éch’ déméloir « Manhattan » qu’on vind achteure à l’ plache d’ech « Metronix », il o eune coutance elgère [20] ed 59.90 uros, z’ez qu’à vir emn hon.me ! Ch’est des rudes [21] vindeux [22] amon « Dinchécan », pis mi j’ sus core un molé [23] niche [24] Ech Manhattan, ch’est biau comme nom in s’ creuroèt à Nouillork, in avant [25] les freurs [26] ed vir arriver King-Kong dins ch’ cassis [27] d’el télé. Awette, « Manhattan » i s’o inchpé [28] dins ches cân.nes comme ech Métronix avant qu’il euche [29] troès moès d’ sarvice. Ech cop chi, in étoèt dins l’temps d’ warantie. Ej m’arvos à ch boutique aveuc ech manicraque padzous min bros.
Lo in m’dit qu’in vo mé l’écanger [30] pour un tout neu [31]. Mi j’n’in veux pus d’chelle arnéqu’rie [32] d’ « Manhattan »-lo, m’in faut un d’eune aute marque, gn o pus eune buque ed fiate [33] à « Manhattan ». I o faullu avoir des raisons [34] aveuc ch’ vindeux, pis ch’ déraqueux [35], pour qu’in m’acoute. Pour défénir, j’ai pa.yé el différinche ed coutance, dix uros, pour acater un déméloir CGV Premio DT3. In l’ l’o mis in route, cha o marché quiques smân.nes. Pis tout d’un un cop [36], in o vu dsus ch’ l’imache eune grosse gân.ne [37] taque [38]. In o fait aveuc [39] challe taque, pache j’étoès mate [40] d’aller à ch boutique pour mi réclamer. El warantie a s’o défini core un cop, pis achteure ch’est l’ chanquiloire [41] qu’a n’ vo pus. Cho qui fait comme à ch fotbal : TNT : 3 contère Dziré 0 ! In févérier, i s’in vont mette in route el’ TNT, in foutant à l’huche [42] ech l’ hertzien. Pour cheux qu’il ont déjo l’ TNT , ches cân.nes a n’s’ront pus à l’même plache, i faura arfaire eune cache à cân.nes [43]. Pour faire cho, gn o poent ches boutons dsus min manicraque, faudroèt qu’ jé l’ faiche [44] aveuc el chanquiloire. Pour malfaire [45], el chanquiloire CGV a n’cminde mie pus rien. Faura core qué j’ racate eune quatérième boîte-déméloir, si qu’éj veux core ravizer l’ télé. El pus mius [46], ch’est qu’ j’ai vu pis intarvu qu’l’implo.yé qui fait l’artique pou l’ TNT, il avoèt plaché sn ayon [47] à ch l’ypermarqué samdi passé. Vlo qui m’edminde si ches manicraques i sont core warantis. Bé nin non, mn homme i vont un an pis core un tiot copon d’temps [48], pis après i quèttent in raques ! Lo, comme toudis, à ch boutique in treuve [49] equ ch’est pus profitant [50] d’ racater qué d’ déraquer ! Echt honme i m’o tut d’ même dit qu’in plot cassis, aveuc l’ TNT in’dins d’ li-même ch’est poent asseuré qu’ cha vache [51] mius. Pis core, eslon ch manicraque ch’est possipe qu’in archeuche [52] poent les mêmes cân.nes. Si ch manicraque i est un molé faibe [53], i n’ s’in vo poent truver tous ches cân.nes. Et pis, gn o mie leumière [54] ed savoir equ cha n’ vo poent aller padvant d’ête rintré à s’mason, pis d’épruver [55] ch’ manicraque. N’in vlo d’eune gueuzrie [56] !
Ben, queu ju ! In est core pus avuri [57] qu’ bénache [58], énon ? Ch’étoèt core gramint mius avant, quanqu’in n’ avoèt poent d’ télé à s’ mason pis qu’in alloèt al série [59] amon [60] d’ses voèsins.
Le 20/12/2010
Dziré (Ablain Saint Nazaire, 62)
[1] tind’rie : action de piéger les oiseaux avec des filets, technique de l’oiseleur
[2] niche : niais, simple par inexpérience ou par ignorance. se dit des enfants
[3] boète-déméloir : adaptateur TNT, il s’agit d’un boîtier permettant la réception et la démodulation d’un signal complexe , pour fournir isolément chaque chaque chaîne au téléviseur ; - le déméloir est habituellement un peigne pour démêler les cheveux
[4] Dinchécan : Aux champs
[5] à deux voès : bi-canal
[6] ravizer : regarder
[7] cân.ne : chaîne
[8] pouilloir : pouvoir
[9] arcopier : recopier, enregistrer
[10] définition : fin
[11] quère in raque : tomber en panne
[12] toulle : mélange
[13] tardiole : radio
[14] ej m’arvos : je repars
[15] boutique, m : magasin
[16] déraquer : dépanner
[17] manicraque : appareil
[18] pus quère : plus cher
[19] radiabler : réparer
[20] coutance elgère : prix léger
[21] rude : fameux
[22] vindeux : vendeur
[23] un molé : un peu, légèrement
[24] niche : niais, inexpérimenté, naïf
[25] avant part. présent du verbe avoir, ayant
[26] les freurs : la peur
[27] cassis : écran
[28] inchpé :empêtré
[29] avant qu’il euche : avant qu’il ait, subjonctif du verbe avoir
[30] écanger : échanger
[31] neu : neuf
[32] arnéqu’rie : harnachement, équipement encombrant
[33] fiate : confiance
[34] avoir des raisons : se quereller
[35] déraqueux : dépanneur
[36] tout d’un un cop : soudain
[37] gân.ne : jaune
[38] taque : tache
[39] faire aveuc : tolérer, supporter
[40] mate : fatigué
[41] chanquiloire : télécommande ; (En Saint-Polois, chanquiller ou chanquilier : remuer sans cesse dans son lit, d’où pour exprimer les changements incessants de chaîne de télévision, chanquiloire pour télécommande)
[42] foute à l’huche : mettre à la porte, jeter, débarrasser
[43] cache à cân.nes : recherche de chaînes
[44] faiche : subjonctif, fasse
[45] pour malfaire : par malchance
[46] mius : mieux
[47] ayon :stand
[48] un tiot copon d’temps : un petit espace de temps
[49] treuve : trouve
[50] profitant : avantageux
[51] vache : subjonctif présent du verbe aller , aille
[52] archeuche : reçoive
[53] faibe : faible, ici peu sélectif
[54] leumière : moyen
[55] épruver : tester
[56] gueuzrie : tromperie, arnaque
[57] avuri : ahuri
[58] bénache : content, heureux
[59] série : veillée
[60] amon : chez