DES MUTERNES ED FOUAN DIN NOU FOTBAL !

Les taupinières du football français !
dimanche 8 mai 2011
par  Dziré

Que des ruses [1] qu’in o aveuc ech fotbal !
In avoèt déjo eu des ruses aveuc ches viers [2] qu’il avoèttent muterné [3] ech gazon d’ech stade Degouve d’ Arrau in 2010.
Après cho gn o eu des rézons [4] in Afrique du Sut intardeux Anelka pis Domenech. El broulle [5] al o vnu dins chl équipe, pis Domenech il o li un mot d’ billet d’ ches bros d’toèle [6] pis d’ ches pieds nickelés d’ fransés. Mais dù qu’in est core pus avuri qu’ bénache [7] ch’est quand qu’ Patrice Evra [8] i dit qu’i gn o un fouan [9] dins chl’équipe fransèze. Un fouan , t’as qu’a vir !
Au jour d’aujourd’hui ch’est à l’ fédération d’ fotbal qu’i gn o des bisbilles [10] à preupos d’el plache ed ches noèrs jueux qui peutent-é canger d’ pays pour ches campionnats intar pa.ys. Vlo qu’ Mediapart, el gazette intarnète, al annonche qu’el fédération d’ fotbal pis chl’ élijeux [11] i veutent-é qu’in euche [12] moins d’noèrs jueux bi-nationaux, dins chl écolache [13] ed Clerfontaine.
Cha y est lzé vlo tertous arpartis à l’cache [14] à fouan. Ch’est eune rude [15] nation [16], da, ches fouans.
Gn in o cor gramint d’ gins qui ditent qu’un fouan ch’est un vénigoutte [17]. À m mote, qu’ech fouan-lo, il o fin bien vu tout l’ rachime [18] qu’i pouyoèt gn avoir à l’ fédération d’ fotbal.
Dins l’ temps chl’élijeux fransé ch’étoèt ch roumain délommé Stefan Kovacs, il avoèt un dijaje bien à li pour dire « ête in fourme » ch’étoèt « ête au taupe niveau » [19]. Vlo ti-poent qu’el fédération d’ fotbal, a s’ rétrique [20] ed tout sin long dins l’rachime, et pis core, ech cop-chi al y est à ch’« taupe niveau », i m’ sân.ne à vir !
In attindis, ches dérijeux [21] d’ech fotbal fransé i peutent-é cujir [22] intar rester din l’ fotbal in mettant leu mouchouo [23] padzeur leu rachime, u bien vnir gardiniers comme mi, lo, i pourront incacher [24] ches fouans.
Pour faire cho, os pouyez mette du poiliache [25] ed thien dins ches galries. Os pouyez intiquer [26] du sayu [27] alintour d’ech cuin [28] du qu’os volez déblayer [29] ches fouans. Os pouyez éparde [30] du chotier [31] d’sayu dins ches galries. Os pouyez core faire un chotier d’jalap [32], pou lzé savoir pus longues,os n’ez qu’à lire ichi :
http://chtimipicard.free.fr/spip.ph...
Os pouyez planter dz ognons à fleurs fritillaire, jacinthe, ayés [33], pis dz ognons d’sintimint [34] ognon, al, apéti [35]. Os pouyez core mette din l’ terre du tourtiau d’richin [36].
Os pouyez planter de bon.nes cache-fouan [37] ; os pouyez core intiquer dsus l’passage d’el galrie, un baton dins l’terre pis afuler [38]ch baton aveuc eune boutèle in plastique, im mettant ch goron [39] padzous, cho fait du karpin [40] din l’ galrie pis ch fouan i n’ n’est fin épeuté [41].

Le 08/05/2011

Dziré (Ablain Saint Nazaire, 62)


[1ruse : tracas, embarras

[2vier : ver de terre, lombric

[3muterner : faire des monticules

[4avoir des rézons : se quereller

[5broulle : brouille

[6bros d’ toèle : bras cassés

[7ête pus avuri qu’ bénache : ne plus savoir quoi faire

[8capitaine de l’équipe de France de football en 2010

[9fouan : taupe

[10bisbille : contestation, conflit

[11élijeux : sélectionneur

[12qu’in euche : subjonctif du verbe avoir qu’on ait

[13écolache : école, centre de formation

[14cache : chasse

[15rude : fameuse

[16nation : famille, parenté

[17vénigoutte : individu qui n’y voit goutte, à la vue basse

[18rachime : racisme

[19l’expression originale est « top niveau », elle est incorrecte ; c’est, soit anglais « top level », soit fançais « meilleur niveau »

[20s’ rétriquer : s’étaler

[21dérijeux : dirigeant

[22cujir : choisir

[23mouchouo : mouchoir

[24incacher : faire fuir

[25poiliache : poils

[26intiquer : enfoncer

[27sayu : sureau

[28cuin : zone

[29déblayer : débarrasser, faire partir

[30éparde : répandre

[31chotier : purin

[32jalap : euphorbe lathyris

[33ayé : jonquille

[34ognon d’sintimint : bulbe condimentaire

[35apéti :ciboulette

[36tourtiau d’ richin : tourteau de ricin

[37bon.nes cache-fouan : borne anti-taupe par ultrasons

[38afuler : coiffer

[39goron : goulot

[40karpin : bruit

[41épeuté : effrayé


Agenda

<<

2018

 

<<

Avril

 

Aujourd’hui

LuMaMeJeVeSaDi
2627282930311
2345678
9101112131415
16171819202122
23242526272829
30123456
Aucun évènement à venir les 6 prochains mois

Brèves

contacter les rédacteurs

lundi 28 mars 2011

J’ai rchu quiques messaches invo.yés par ches lijeux. Jé lzé li, pis core j’ai poent pouillu rinfliquer pache vous messaches i sont invo.yés dins m’ boète à lette par ech manicraque. Pour mi savoir édu adercher l’ rinflique, fauroèt qu’os laichèches vou adrèche mail dins ch tesque d’ech messache.
Amiteuzmint
Dziré

Pour une réponse personnalisée à un contact avec un rédacteur, il est indispensable de laisser votre adresse mail dans le corps du message.