QUOÉ QU’OS ALLONS MIER ?

sécurité alimentaire, concombre, pousse de soja, steack haché
jeudi 23 juin 2011
par  Dziré

Ches jornalisses, il ont tous les vices pour eusses vinde du papier pis acliper [1] ches ravizeux [2] à l’ télé pour eusses vinde fin quère [3] des réclames.
Vlo qu’ ches alemans il attrapent-é la drisse [4], pis qu’à forche ed débagouler [5] i n’in défunctent [6]. In o caché [7] quoè qu’ ch’est qu’il avoèttent bien mié [8] pour eusses escliboter [9] ainsin in allant à l’ tchiware [10]. Gn o eu gramint d’ doutance [11] après ch’ concompe espagnol. Rapor à cho, dsus toute la terre du monte, tous ches bouticliers [12] il ont resté aveuc leu concompes edsus leu bros !
Ches alemans, il ont truvé eune braque-térie [13], délommée E.coli qu’al fait siner [14] ches gins. In o dit qu’ challe braque-térie a vnoèt d’ech brin d’ vaque qu’in o mis pour aminder [15] ches légueumes.
Nouzautes, in étant jôn.nes, in o toudis mié des légueumes d’ech gardin qu’ min pére i pichotoèt [16] aveuc nou brin [17] puché [18] dins l’ tchiware. In n’o mie janmé été malate. Ch’est vrai qu’achteure ches bétals i sont norris à l’ drogue, savez, gramint d’intibiotiques qui faitent core ed l’effet dins ches tchiures, pis core qu’in peut faire du concompe ed farmasrie in l’ l’arouzant aveuc el brin d’ ches bétals-lo !
Ches cinsiers espagnols pis fransés, il ont volu faire la guerre à l’ Alemane, qual o déparé [19] ches concompes. Ech concompe, ravisez-l’ comme innochint [20].
Ches alemans, il ont arnonché à tnir carrure [21], à forche qu’il avoèttent prins l’ peurène [22] d’ech concompe. Alorse il ont caché à truver quite cosse in Alemane. Ch’est adont qu’il ont dessaqué [23] Mungo, chl haricot qui fait des jarnes [24] ed soja.
(pététe qu’i gn’o un soja qui fait des jarnes d’haricot, énon ?)
Ch’ étoèt chelle salate, aveuc des jarnes ed soja ed dins qu’al donnèt el drisse mordreuse [25]. Alors in o freumé chl interprinse ed jarnerie pour avoir el définition [26] d’ ches haricots.
Awette, ch’est adont qu’in Franse gn o eu des tiots qu’il ont vnu malates aveuc leu panche [27] qu’al leu coiche [28] rudmint , et pis cor avec la drisse comme d’el pichate [29]. In o core artruvé [30] chl E coli dins du bistèque copillé [31] fait à Saint Dizier aveuc d’al bidèle [32] qu’al vient d’ Bergique, d’Alemane, pis d’ Holande. Ch’est un bistèque copillé qu’il o dsus sn étiqué [33] « barzuqué [34] in Franse ». T’as qu’à vir, in peut sn aller à ch camp d’ quate [35], in invalant [36] sin péqueume [37]. Si qu’os volez, un molé d’ seurté d’ miache [38], faut qu’os mièches [39] fauqu’ [40] des frites, mes gins, fauqu’ des frites !

Le 22 juin 2011

Dziré (Ablain Saint Nazaire, 62)


[1acliper :attirer à soi dans un but intéressé

[2ravizeux : spectateurs

[3quère : cher

[4drisse : diarrhée

[5débagouler : évacuer du liquide en grande quantité

[6défuncter : décéder

[7cacher : chercher

[8mier : manger

[9escliboter : éclabousser

[10tchiware : cabinet d’aisances

[11doutance : doute soupçon

[12bouticlier : commerçant

[13braque-térie : corruption du français bactérie ; braque adj signifie écervelé, étourdi

[14siner : saigner

[15aminder : répandre de l’engrais

[16pichoter : arroser avec de l’engrais « humain »

[17brin : excréments

[18puché : puisé

[19déparer :déprécier

[20ravisez-l’ comme innochint : regardez le comme un innocent, il est présumé innocent

[21ténir carrure : résister, tenir tête

[22peuirène : peur, frayeur

[23dessaquer : sortir (du sac)

[24jarne : germe, pousse

[25mordreuse : meurtrière

[26définition : fin

[27panche : ventre

[28coicher : être douloureux, faire mal

[29pichate : urine

[30artruver : retrouver

[31copiller : hacher

[32bidèle :chair de vieille vache, viande bovine dure et coriace

[33étiqué : étiquette

[34barzuqué : bricolé, élaboré

[35ch camp d’ quate : appellation locale pour le cimetière

[36invaler : avaler

[37péqueume : cuisine, apprêt des aliments

[38seurté d’ miache : sûreté alimentaire

[39faut qu’os mièches : il faut que vous mangiez

[40fauqu’ rien que


Agenda

<<

2018

 

<<

Avril

 

Aujourd’hui

LuMaMeJeVeSaDi
2627282930311
2345678
9101112131415
16171819202122
23242526272829
30123456
Aucun évènement à venir les 6 prochains mois

Brèves

contacter les rédacteurs

lundi 28 mars 2011

J’ai rchu quiques messaches invo.yés par ches lijeux. Jé lzé li, pis core j’ai poent pouillu rinfliquer pache vous messaches i sont invo.yés dins m’ boète à lette par ech manicraque. Pour mi savoir édu adercher l’ rinflique, fauroèt qu’os laichèches vou adrèche mail dins ch tesque d’ech messache.
Amiteuzmint
Dziré

Pour une réponse personnalisée à un contact avec un rédacteur, il est indispensable de laisser votre adresse mail dans le corps du message.