COLAS CACOUILLEUX

Nicolas le trompeur à propos des algues vertes.
lundi 11 juillet 2011
par  Dziré

Queu sapré cache-à-voèx [1] ech Sarkozy, i est déjo in route à promette pis à aflater [2], un molé tout partout in Franse. Christian Jacob, ech dépeuté I.M.P. [3], i dijoèt qu’ DSK ch’n’étoèt poent un honme ed terroè [4] pis, rapor à cho, qu’i n’éroèt poent fait un bon prézidint pou ches Fransés. Tandisse équ Sarkozy, ed Neuilly dzeur Seine, li, ch’est un vrai honme ed terroè. Ch’est qu’i gn o rudmint gramint [5] d’ camps [6] pis d’ pature [7] pis d’ courtillaches [8] à Neuilly, énon ? Un fin biau terroè, aveuc fauqu [9] des gins fort caleys. [10]. Ch’est pour cho qu’ Sarkozy i prind à ches pauvères gins pour li bailler [11] à ches gins caleys, comme il o fait aveuc sin rados d’ forteune. [12]
Vlo ti poent qu’in allant aflater ches cinsiers Bertons, pousseux d’ pourchaux [13], Sarkozy qui défind tous ches victimes, i s’o invoè [14] à Crozon el 7 ed juhiet, pis qu’i dit comme cho tout droèt dvant li [15], equ cho n’est poent eune buque [16] d’el faute ed ches cinsiers si qu’i gn o si tant d’ vertés alques [17] dzeur ches plages in Bertân.ne. Pour li, chl ajouque [18] liméro un [19], ches cinsiers ch’est des victimes ed l’agriculture, qu’a n’suit poent ches règs pour warder l’ nateure fin futeuse [20]. T’as qu’as vir, queu gueuzrie [21] qu’i nous arfait-lo. I dit qu’ ches écologisses ch’est fauqu des intégrisses, pis ches jornalisses i les laichent-é d’trop parler, ches écologisses.
Cho qui est farce [22] dins ches cacoules [23] Sarkozy, ch’est un dijaje comme echti-chi « Sur cette affaire d’algues vertes, il serait absurde de désigner des coupables, de montrer du doigt les agriculteurs qui font d’énormes progrès en la matière  ». Ch’est des progrès d’el même nateure équ les progrès d’ches droèts d’ l’Honme in Tunisie, quand qu’il o té vir sin comarate Ben Ali, équ ches tunisiens i l’ l’ont incaché [24] à forche qu’ [25] il étoèt jusse aveuc ches droèts d’l’Honme. Faut-ête rudmint venigoutte [26] u bien rudmint tère in creuyance [27] pour gober [28] chelle-lalle. M’apinse si ches Fransés i sroètent-é si bêtes equ’ cho ?
Edpis 2010, ch’est nouzaute qu’in est obligé d’ pa.yer pour débla.yer [29] ches vertés alques, aveuc nous conterbussyons. Pour chinq ans, ch’est un éparsin [30] d’134 myions d’ uros, qu’in s’in vo invo.yer à la mer ! Edpis l’queuminchmint d’ l’année 2011, ch’est déjo 25 000 mètes cupes d’ vertés alques qu’in o récou [31], ch’est deux foès cho qu’in o eu in 2010.
Et pis il o volu nous faire accroire qu’in alloèt débla.yer chl azote in faijant du gaz ed marais [32], du proute ed vaque [33] aveuc ech chotier d’ pourchau [34]. Seulmint ech gaz ed marais (CH4) ch’est du carbone pis d’ hydrogène, alorse in s’in vo core rester aveuc ech l’azote, qu’al queurt [35] à l’rivière pis par après à la mer, et pis core qui sert d’amindiche [36] pour ches vertés alques. El méthanisation d’ech chotier d’ pourchau, cha rest [37] core eune cacoule Sarkozy. Pus pire, ch’est qu’i n’ veut poent dire qu’in s’in vo laicher ches pousseux d’ pourchaux éparde [38] plus ed chotier dins ches camps et pis n’ poent énorter [39] ches vaquers à faire ed l’ herpe pour laicher patûrer leus vaques [40], pour avoir moins d’azote qu’al queurt à l’iau. In rue [41] 134 myions d’uros à la mer pou ches vertés alques, et pis in s’in vo laicher vuidier [42] plus d’azote dins ches camps, pis dénorter [43] ches cinsiers d’ bailler [44] d’l’herpe à leus vaques.
Un cacouilleux [45] comme Sarkozy, faut s’in débarracher au pus rade [46] , habile [47] maï 2012 qu’in vote, pour li foute es capote [48] !

Le 10 juillet 2011

Dziré (Ablain Saint Nazaire, 62)


[1cache-à-voèx : démagogue

[2aflater : aduler, caresser

[3I.M.P. Insân.ne Minteux Prometteux : Union des Menteurs et des Prometteurs

[4terroè : terroir

[5rudmint gramint : énormément, à l’excès

[6camp : champ

[7pature : pré, prairie

[8courtillache : jardin

[9fauqu : rien que

[10caley : aisé, riche

[11bailler : donner

[12rados d’ fortune : abri pour la fortune = bouclier fiscal

[13pousseux d’pourchau : éleveur porcin

[14i s’o invoè : il es parti

[15droèt dvant li : sans réfléchir, à tort et à travers

[16poent eune buque : pas du tout, absolument pas

[17vertés alques : algues vertes

[18ajouque : individu qui veut en tout et sur tout avoir droit et raison

[19liméro un : numéro un, de tout premier ordre

[20futeux : vigoureux, en bonne santé

[21gueuzrie : tromperie, escroquerie

[22farce : curieux

[23cacoule : conte blague, mensonge

[24incaché : chassé

[25à forche qu’ : tellement

[26vénigoutte :individu qui n’y voit goutte, à la vue basse

[27tère in creuyance : crédule

[28gober : avaler, croire

[29débla.yer : débarrasser

[30éparsin : éparpillement

[31récou : récolter

[32gaz ed marais : méthane

[33proute ed vaque : pet de ruminant, méthane

[34chotier d’pourchau : lisier de porc

[35al queurt : il s’écoule

[36amindiche : engrais

[37cha rest : c’est de nouveau

[38éparde : épandre

[39énorter : inciter, encourager

[40vaque :vache

[41ruer : jeter

[42vuidier : vider

[43dénorter : détourner

[44bailler : donner

[45cacouilleux : qui conte des cacoules, trompeur

[46rade : adv,vite

[47habile : vivement

[48capote : défaite électorale


Agenda

<<

2018

 

<<

Septembre

 

Aujourd’hui

LuMaMeJeVeSaDi
272829303112
3456789
10111213141516
17181920212223
24252627282930
Aucun évènement à venir les 6 prochains mois

Brèves

contacter les rédacteurs

lundi 28 mars 2011

J’ai rchu quiques messaches invo.yés par ches lijeux. Jé lzé li, pis core j’ai poent pouillu rinfliquer pache vous messaches i sont invo.yés dins m’ boète à lette par ech manicraque. Pour mi savoir édu adercher l’ rinflique, fauroèt qu’os laichèches vou adrèche mail dins ch tesque d’ech messache.
Amiteuzmint
Dziré

Pour une réponse personnalisée à un contact avec un rédacteur, il est indispensable de laisser votre adresse mail dans le corps du message.