FAIRE SES AIRS AVEUC CHES PRIMAIRES !

réaction aux primaires socialistes
mercredi 12 octobre 2011
par  Dziré

In o vu gramint [1] d’ primaires ches derniers jours, pis in s’édminde core édu qu’i sont muchés [2] ch socialime pis ch prougrame socialisse .
Cho n’impèche poent eune buque [3] ches agarants [4] Sarkozy ed juer à « Colas i a dit » [5] in lzé voèt défiler à l’ télé pour eusses dire rouche et rache [6] ed ches primaires socialisses, tellemint qu’i sont pleins d’ jalouzetey [7] d’én poent n’avoir fait autant. Sarkozy, il o déloyé ses thiens dogues [8], Copé, Morano, Apparu, Pécresse, pour qu’iln lzé voèche [9] amoutrer [10] leu broquards [11] dins ches télés. Ches socialisses il ont eu gramint d’acou [12] à l’ télé padvant ch premier votache el 9 d’octope, pis il ont eu eune masse ed voteux à leu primaires, equ ches gaujeux [13] i n’avoèttent poent été capapes d’annoncher. Vlo ti poent qu’echl ajouque [14] li-même i vient nous dire qu’ech grand Châles [15], i n’éroèt poent volu qu’in faiche [16] quate tours à ch’ votache ed Prézidint, pour cho faire, i conte ches primaires pou deux tours d’ech votache ed Prézidint. Queu praqueux [17], énon ?. Ch’est d’l’infunquache [18] ordinaire qu’i nous fait lo, aveuc el Constitution. Pace mi, j’ai core sus min cœur qu’in o arcangé [19] l’ Constitution pour nous artirer [20] ch’ votache d’ech Traité Uropéïn, savez ch traité d’ Lisbonne, tellemint qu’i drissoèt [21] dins ses maronnes [22] in pourpinsant [23] qu’in éroèt pouillu [24] li réponde « non » comme in l’avoèt déjo fait à 55 dins 100,in 2005. Lo, asseuré qu’ech règ d’el Constitution De Gaulle, ch’est un réferendum pour tous ches traités qu’ la France al doèt ratifier. Ch’est tout ch peupe fransé qui doèt ratifier ches traités. Sarkozy i n’ n’o poent foute [25] ed De Gaulle, pour li faire ed l’épouriche [26] aveuc l’Urope, alors gn o poent à l’ laicher dimbler [27] dsus ches primaires lo, li, Sarkozy, i n’in vient sgondaire !
Taijez-vous mes gins, tous ches IMP, il ont truvé qu’in n’ parloèt poent assez d’eusses, pis qu’in in dijoèt d’ trop dsus ches socialisses. Eh ben, mi j’ dis min cœur comme il est, abile [28] el définition d’ ches primaires, qu’in arpalche [29] ed ches pauvères gins aruinés, à joque [30], sins doupes, [31] qu’i jouquent-à [32] l’ fertile [33].
Abile qu’in rintinche [34] des nouvièles ed tous ches amisses à Sarkozy, qui débagajoèttent [35] ches doupes dins des valisses pou pa.yer el campân.ne ectorale. Abile qu’in dminde d’es débaracher d’echl escret définse pour ches fransés morts à Karachi in 1992.
Abile qu’in arcompte ches mille uros qu’ Sarkozy il o promis à ches imployés. Compter pis fénir à troès uros pis la mitan d’ech quatériéme [36], comme amon [37] Securitas, u bien fénir à vingt-quate comme amon Ipsos. Saprè promettache echl ‘acatoir [38], enon ?
Abile, qu’in cache [39] qui qu’ch’est qu’il alloèt rinpleumer [40] sin porte-monnoée amon Bettencourt.

Le 10/10/2011

Dziré (Ablain Saint Nazaire, 62)


[1gramint : beaucoup

[2muché : caché

[3poent eune buque : pas du tout, absolument pas

[4agarant : partisan

[5Colas i a dit : Jacques a dit, le rôle de Jacques est tenu par Colas, abréviation de Nicolas

[6dire rouche et rache : déblatérer, s’emporter contre quelqu’un, dire tout le mal imaginable

[7jalouzetey : jalousie

[8déloyé ses thiens dogues : laché ses chiens de défense

[9qu’in lzé voèche : qu’on les voie, subjonctif

[10amoutrer : montrer

[11broquard : canine, croc

[12acou : écoute, succès

[13gaujeux : sondeur

[14ajouque : individu qui veut avoir en tout et partout, droit et raison

[15grand Châles : grand Charles, = De Gaulle

[16qu’in faiche : qu’on fasse, subjonctif

[17praqueux : faiseur d’embarras, individu prétentieux

[18infunquache : enfumage

[19arcangé : changé

[20artirer : retirer, reprendre

[21drisser : évacuer des excréments liquides, avoir la diarrhée

[22maronnes : pantalon

[23pourpinser : réfléchir, méditer

[24qu’in éroèt pouillu : qu’on aurait pu

[25i n’ n’o poent foute : n’en a que faire de

[26épouriche : vantardise, forfaznterie, vantardise

[27dimbler : dire du mal, calomnier

[28abile : vivement

[29qu’in arpalche : que l’on reparle, subjonctif

[30à joque : sans travail, chômeur

[31sins doupes : désargentés

[32jouquer : dormir (comme les poules sur un perchoir)

[33à l’ fertile : à la belle étoile

[34qu’in rintinche : que l’on entende de nouveau, subjonctif

[35débagajer : déménager

[36troès uros pis la mitan d’ech quatérième : 3,50 euros

[37amon : chez

[38acatoir : argent, monnaie, par extension pouvoir d’achat

[39cacher : chercher

[40rinpleumer : remplumer, reconstituer


Agenda

<<

2018

 

<<

Avril

 

Aujourd’hui

LuMaMeJeVeSaDi
2627282930311
2345678
9101112131415
16171819202122
23242526272829
30123456
Aucun évènement à venir les 6 prochains mois

Brèves

contacter les rédacteurs

lundi 28 mars 2011

J’ai rchu quiques messaches invo.yés par ches lijeux. Jé lzé li, pis core j’ai poent pouillu rinfliquer pache vous messaches i sont invo.yés dins m’ boète à lette par ech manicraque. Pour mi savoir édu adercher l’ rinflique, fauroèt qu’os laichèches vou adrèche mail dins ch tesque d’ech messache.
Amiteuzmint
Dziré

Pour une réponse personnalisée à un contact avec un rédacteur, il est indispensable de laisser votre adresse mail dans le corps du message.