Nouzautes, qu’os restons dins l’ Norpadcalé, os ons pardu nous rouche étiqué [1] dins l’ moès d’novimpe 2011, rapor à d’l’idiote 131 [2]. Savez mes gins, d’l’idiote, ch’est un ju qu’ches farmassiens i n’in font d’el pinture, ouais d’el pinture d’idiote. Dins chl affère-lo, gn o poent dzoin d’aller droguer [3] à l’ farmasserie, ch’est un neuache [4] d’idiote 131, qu’il o vnu varouler [5] padzeur nous pa.ys pis s’insaquer [6] dins nouz aspiral [7]. Comme toudis, ches agarants [8] d’ches patriqueux [9] d’noyaux d’l’atome, il ont prins la parole sans rien dminder à parsonne pour nous bacheiner [10] comme d’habitute, « Gn o poent eune buque [11] ed dinger ! ». Comme du Médiator, comme ed l’amiante, faut poent déturber [12] incore moins inchper [13] el liberté d’ches bouticliers [14]. Au queuminchmint [15] d’ech vintième sièque in vindoèt du radium dins tous ches bons boutiques ! Adont, ch’étoèt la mode d’acater [16] des produits au radium. In avoèt truvé dz arlommés medcins qui faijoèttent d’el réclame pou l’ bénachté [17] d’ech radium ; aveuc ech radium in arguérichoèt tous ches maladies inmaginapes : ed l’artruite [18], dusqu’à ch’ chanque [19], d’el pertinsion d’ches altères [20] dusqu’à les yux d’ches avules [21]. Ch’étoèt un fin bon armède pour faire bouloter [22] chl amasse [23] ed ches charlatans. Mais, adont, fauloèt aller acater tous ches produits-lo à ch marqué [24] u bien core à l’farmasserie, ch’ cop chi, chl idiote 131 a nous o té acconduite pour arien, tertous il o pouillu n’in proufiter. Cho qu’il est fin rédeux, ch’est pou s’définde conte echl idiote 131, qu’al est radioactife, in peut prinde d’el pinture d’idiote, t’as qu’à vir !
Gn o mie mo.yen d’ savoir qui qu’ch’est qu’il l’o défreumée [25] chl ‘idiote-lo, ch’est tut à fait cho el seurté nucléaire !

Le 21/11/2011

Dziré (Ablain Saint Nazaire, 62)