YARSAGUMBU, EL PUÈTE-CARPLUTE D’HYMALAYA !
par
Yarsagumbu... ch’est du parlache népalè « yarsa » ch’est insèk ed ches courts jours [1] pis « gumbu » ch’est plante ed ches biaux jours. Ch’est fin farse [2], un félomène comme cho. os pouillez toudis cacher après [3] « yarsa » chelle carplute-lo [4] a n resse [5] equ dins ches montanes d’ Hymalaya.Ch’est un insèk qui grandit padzous l’ terre à pus d’ quate mille mètes in hauteur. Aveuc el freinte [6] ed ches neiches, pi l’courage [7] d’el iau, ches espores [8] i s’intiquent [9] in avandeur [10] dins l’ terre pis d’hasard [11], i s’lanchent-é [12] din l’ carplute, pis comme si qu’cho sroèt dz « aly.ines » [13] il y granditent in beyant [14] bien à laicher [15] ches organes vitals pour proufiter l’pus lonmin [16] d’el carplute. Ch’est cho « faire vie qui dure » [17]. Pis quand qu’ chelle puète [18] al vient adulte, al fait camper [19] l’caboche [20] d’el carplute, pis al sorte [21] pour définir [22] sin cruchon [23] in équipant [24] un molé [25] dins chl erpe [26].
Yarsagumbu ch’est eune créïature, qu’in dit qu’al arguérit des maladies, qu’al fait du bien à la santé pis qu’al rajôn.nit ches gins, ch’est un rinfortifiant [27], pis core un énorteux d’ coquage [28], eune sorte ed saute à l’fème [29] , qu’in dit… Pindant lonmin, gn avoèt fauqu’ echl impreur ed Chine qui gn avoèt droèt. Au jour d’ojordui, el vindache [30] d’yarsagumbu, ch’est des myiards d’uros. Tous lz ans avec ches biaux jours des dijân.nes ed mille ed paysans aveu leuz éfants i sont invoès [31] de leu villache dins ch Tibet pis dins ch Népal, pindant des smân.nes ed long, pour eusses défouir [32] aveuc eune nénenne d’ hoètte [33], chelle créïature mitan bète, mitan plante. In deux moès, i ganent é plusse qu’el resse ed l’année à warder leus bétals.
Ch’est Eric Valli, quiqu’un qui connoèt fin bien ches pa.ys d’ l’ Hymalaya, qu’il o vu ch’ boulverse [34] qu’i gn o eu amon d’ [35] ches pitites gins pour gagner plein d’doupes in arcueillant [36] chl yarsagumbu dins ches montân.nes.
Maginez un molé truvoir un pétit machin d’el talle d’un nettieux d’dint [37] dins des myiards ed plés [38] d’erpe pis core dins l’ neiche, pis dins l’froed.
Ges pauvères gins il in défunctent intrinés dins dz avalanches, il in défunctent in queyant d’eune falaisse, ch’est des vies ed dur thien [39], énon ? In est-lo à quate pattes pis in mile chitimète carré après chintimète carré.In est dsus ches pus hautes gringoles [40] ed la terre du monte.In est intar deux 4500 mètes pis 5500 mètes d’ hauteur. In est à l’pied d’ches glachiers, pis à fait qu’el neiche al freint [41] in maï pis in juhin gn o eune masse ed gins qui n’ décessent poent d’ [42] monter pus haut, pour épruver [43] d’récour [44] ch yarsagumbu, chl’ insèk d’ches courts jours in même temps qu’el plante ed ches biaux jours.
Faut vir, ches abloqueux [45] qu’il avanchent-é des doupes à ches « cueilleux ». Ches gins i sont tellmint lapides [46] qu’i n’peutent-é mie laicher passer eune parèle chance ed gagner des doupes.
Gn o toudis plus ed cueilleux, cho fait qu’in plache ed [47] cueiller chint [48] yarsagumbu par jour, comme gn o in eune dijân.ne [49] d’ans, si qu’i n’in treufent-é [50] core dich [51] ojordui, ch’est fin biau.
Ches hommes pis ches éfants i s’in vont in masse [52] dsus ches gringoles, mais i n’arviendront pos tertous. Pis aveuc ses yarsagumbu dins s’musette, in o toudis peur d’es faire « robiner » [53] pindant qu’in dort. Gn in o qu’il ont dzoin d’ juer,savez pour gagner d’plus, pis qu’i mettent dins l’ ju cho qu’il ont récou d’ yarsagumbu. Tant pire si qu’ ches dès il arquètent [54] défavorape [55] ! Involtés [56], viaux [57], vaques [58], pourchaux [59], pouchins [60] comme al diroèt Perette.
Ches cueilleux i vintent cho intar chint roupies ( un uro) pis troès chints roupies (à l’ cantourne ed troès uro). À Katmandou el coutance [61] d’un kilo d’yarsagumbu ch’est un myion d’roupies, quite cose comme dix mille uro.
Le 18/01/2012
Dziré (Ablain Saint Nazaire, 62)
[1] insèk ed ches courts jours : insecte d’hiver
[2] fin farse : très rigolo, plutôt très curieux
[3] cacher après : chercher
[4] carplute : chenille
[5] resse : reste, demeure
[6] freinte : fonte
[7] courage : ruissellement
[8] espores : spores
[9] s’intiquer : s’enfoncer
[10] avandeur : profondeur
[11] d’hasard : à l’occasion
[12] s’lancher : se fourrer, s’insinuer
[13] aly.ines : « alien »
[14] beyer : veiller à
[15] laicher : laisser
[16] lonmin : longuement
[17] faire vie qui dure : économiser, user avec parcimonie
[18] puète : champignon
[19] camper : exploser
[20] caboche : tête
[21] al sorte :elle sort
[22] définir : finir
[23] cruchon : croissance
[24] équiper : dépasser, émerger
[25] un molé :un peu
[26] erpe : herbe
[27] rinfortifiant :dopant
[28] énorteux d’coquage : aphrodisiaque
[29] saute à l’ fème : excitant sexuel
[30] vindache : commerce
[31] invoè : litt.en voie, en chemin, fig. parti
[32] défouir : déterrer
[33] hoètte : houe à main
[34] boulverse : agitation, désordre, boulversement, catastrophe
[35] amon de chez, parmi
[36] arcueiller : récolter
[37] nettieux d’ dint : cure-dent
[38] plé : brin
[39] vie d’ dur thien : vie rude
[40] gringole : pente très escarpée
[41] freint : fond
[42] n’poent décesser de : continuer à
[43] épruver : essayer
[44] récour : récupérer, récolter
[45] abloqueux : support financier, sponsor, à l’image – toutes proportions gardées – du financement des courses à la voile
[46] lapide : traîne misère
[47] in plache ed : au lieu de
[48] chint : cent
[49] dijân.ne : dizaine
[50] treuvent-é : trouvent
[51] dich : dix
[52] in masse : en grand nombre
[53] robiner : marauder, voler
[54] arquère : retomber
[55] défavorape : adv. défavorablement
[56] involtés : disparus
[57] viau : veau
[58] vaque : vache
[59] pourchau : cochon
[60] pouchin : poussin –pouchins : couvée
[61] coutance : prix