CHES DARNIERS FOURINS

derniers changes de francs, le 17/02/2012
samedi 18 février 2012
par  Dziré

Ojordui, vintardi 17 ed févérier 2012, à chinq heures d’après-nonne [1] tout jusse, à l’ Banque ed France il ont freumé [2] ches trapettes [3] , édu qu’on pouyoèt vnir arcanger [4] ches darniers billets d’monnoè in fourin [5], qu’on o rimplaché edpis 2002, par d’l’uro. Ches gins il ont fait des rudes [6] afilées [7] pour attinde leu tour. Is n’ n’avoèttent artruvé tout partout des fourins ; dins des wardrobes padzous ches lincheux [8], dins ch grand vasse [9] padzeur el tablette d’el quéminée, dins des cauches [10], dins l’ vielle boîte à caïffa [11]
Ch’est cho ête fin wardeux [12] !
Ch’est vré qu’i gn in o des vyuzries [13] qu’on o poent eune buque invie d foute à l’uche [14].
Ech viux espincère [15] tout traué [16] qu’on met sus sin dos pou raviser l’ télé din sin cadot [17]. Ech vasse in cuife fait dins l’ cul d’un obus d’la guerre quator, qu’on o hérité d’ matante Hinriette, El photo gân.nie [18] par ch temps, d’un vo.yache à la mer intar deux dz amisses ed régimint. Pis echl épalmint [19] d’ chl’anokeusse [20] intallée [21] par Oscar Roty qu’al o épard [22] sminche [23] pindant pus d’un sièque à l’cul [24] d’ ches pièches d’el République.
Ches jôn.nes [25] d’asteure, i n’és barachent-é poent eune buque [26] ed tout cho. Du momint qu’il ont dz uros pour euses acater des jus d’cassis [27] pis des cauchures ed basket arnommés i s’in foutent pas mal d’én pus vir chl’ anokeusse à l’cul d’ches pièches.
Mais, nouzautes qu’on l’o eu si cair [28] ech franc, vlo qu’on s’ treuve fin armeué [29], ed faire récompinser [30] nous darniers fourins à l’ trapette ed la banque, ch’est un vré dépichaje [31]. Tous ches souvnances [32] qu’al arvientent din nous caboche [33] in rindant ches imaches saintes ed Debussy, Saint-Exupéry, Cézanne, Gustave Eiffel et pis core Pierre pis Marie Curie.
On s’artreuve in route à déculer [34] dins l’ temps passé.
Nous rvlo campions du monte ed fotbal. Adont, dins l’ temps d’ech fourin, fauloèt rester quin jours sans ouvrache pour ête un joqueux [35]. Et core, ch’est pache qu’i n’avoèt poent truvé eune plache à sn idée dins ches vingt-chinq annonches qu’on li faijoèt din l’ jornée. Ch’étoèt core el bon temps qu’un ovrier qu’i dijoèt à ses comarates qu’in canjant d’patron, il avoèt gagné vingt chintimes ed plus à l’heure, ch’étoèt jusse cho qu’i faulloèt pour lzé faire tertous canjer d’boutique ! On éroèt dit qu’ech patron il avoèt pardu s’ quinzân.ne ! Adont, dins l’temps d’ech fourin, on avoèt un cruchon [36] écolomique qui dégotoèt [37] les diches au chint [38]. Pis on avoèt étou d’ l’infle [39] ed coutance [40] à l’avnant [41] . Ech z éfants i z alloètent à jouque [42] à sept heures pis l’mitan [43] d’après-nonne, après qu’ gra-mère à pourette [44] al avoèt passé u bien qu’il avoèttent ravizé à l’ télé Nounours, Colas, Pimpernelle pis core ech’ marcand d’ sape ! Adont Gân.ni Din l’Idée [45], i n’avoèt pos core dzoin d’éleunettes, pour li cujir [46] Sarkozy, pis core placher s’ forteune in fourins suisses.
Adont , ch’étoèt core el bon temps qu’on avoèt tous les vingt chinq ans el bénachté [47] d’es faire trauer s’ piau dins ches Ardin.nes [48] u bien core dins ches Aurès in Argérie. Pourquoè dont qu’on argrette ech sapré fourin ? Eh ben, comme toudis, ch’est qu’on o dins l’idée qu’ch’étoèt gramint miux avant pache qu’on avoèt dich, vingt trinte u bin chinquante ans d’ moins. On avoèt gramint d’ plus ed caveux [49], poent eune buque [50] ed panche à poirette [51], poent l’ moindère coichure à ses ployants [52], forchémint, ch’étoèt gramint miux avant…

Le 17/02/2012

Dziré (Ablain Saint Nazaire, 62)


[1après-nonne : après-midi

[2freumé : fermer

[3trapettes : ouverture du guichet

[4arcanger : changer

[5fourin : franc

[6rude : considérable

[7afilée : file d’attente

[8lincheux : drap de lit

[9vasse : vase

[10cauche : bas

[11boîte à caïffa : boîte métallique de la marque de café « caïffa »

[12wardeux : conservateur

[13vyuzrie : vieillerie

[14foute à l’uche : jeter, se débarrasser de

[15espincère : gilet de laine

[16traué : troué

[17cadot : fauteuil

[18gân.nie : jaunie

[19épalmint : mesure au pas

[20anokeusse : semeuse

[21intallée : gravée

[22épard : épars, épandu

[23sminche : semence

[24cul : devers, dos

[25jôn.ne : jeune

[26n’ poent s’ baracher eune buque : ne pas se soucier du tout

[27cassis : chassis pour console video

[28on l’o eu si cair : on l’a tant aimé

[29armeué : ému

[30récompinser : rembourser

[31dépichaje : déchirement

[32souvnance : souvenir

[33caboche : tête

[34déculer : reculer

[35joqueux : chômeur

[36cruchon : croissance

[37dégoter : dépasser

[38diche au chint : 10%

[39infle :gonflement, ici, inflation

[40coutance : prix

[41à l’avnant : en rapport

[42aller à jouque : se coucher

[43mitan moitié, demie

[44pourette : poussière

[45Gânni Din l’Idée : Johny Halliday

[46cujir : choisir

[47bénachté : bonheur

[48Ardin.nes : Ardennes

[49caveux : cheveux

[50poent eune buque : absolument pas, pas du tout

[51panche à poirette : embonpoint, ventre très proéminent

[52coichure à ses ployants : douleur aux articulations, arthrose


Agenda

<<

2018

 

<<

Juillet

 

Aujourd’hui

LuMaMeJeVeSaDi
2526272829301
2345678
9101112131415
16171819202122
23242526272829
303112345
Aucun évènement à venir les 6 prochains mois

Brèves

contacter les rédacteurs

lundi 28 mars 2011

J’ai rchu quiques messaches invo.yés par ches lijeux. Jé lzé li, pis core j’ai poent pouillu rinfliquer pache vous messaches i sont invo.yés dins m’ boète à lette par ech manicraque. Pour mi savoir édu adercher l’ rinflique, fauroèt qu’os laichèches vou adrèche mail dins ch tesque d’ech messache.
Amiteuzmint
Dziré

Pour une réponse personnalisée à un contact avec un rédacteur, il est indispensable de laisser votre adresse mail dans le corps du message.