EL VAQUE GLORIEUSSE AL FAIT SIN BOUZO DINS L’CAPITALE !

dimanche 26 février 2012
par  Dziré

El vaque glorieusse [1] al fait sin bouzo [2] dins l’ Capitale.
Ch’ est qu’i faut s’y prinde longtemps à l’avanche pour aller faire el krânne [3] dins l’ Cour Jeannette à Vaques [4].
Bien asseuré, i faut toute eune organisation, ch’est des gins et pis des mo.yens. I faut faire edz étapes [5] pis cor des berkries [6], tout cho à l’ Porte ed Versalles à Paris, faut l’y ratriner [7] d’el palle [8] edz abruvoirs [9] et pis cor toute…Faut core l’y mânner [10] ches tracteurs, ches méchoneusses-batteusses [11], ches copilleusses [12]. I faut core apatler ches pompes [13] à l’ bière, pis akeuter [14] ches roulottes édù qu’i faitent el cuisage [15] ed leu pékeume [16]. Tout cho ch’est déjo fin malaju [17], gn o gramint d’ simétris [18]. Mais, chl année-chi ch’est ch’ coq [19] !
Chl année-chi, qu’on s’in vo cujir [20] un nouviau prézidint pou chinq ans, i gn érot du passage dins l’ Cour Jeannette à Vaques, pace i faut s’ faire vir à l’ cul d’ chés vaques pour faire eune bonne campâne électorale. Mais cho qu’i gn o d’pus imbêtant, ch’est qui n’faut poent laicher deux candidots s’creujer dins ches allées d’ech comice agricole. Tout cho ch’est de l’imbête-gins [21] pour duire [22] à ches poulitiques.
Mais cho qui porte in preume, ch’est d’ s’apinser à Magritte, Muguette, Vinque [23] tous ches bellé vaques qu’al sont invoées [24] à Paris pou ch’prime [25] tout comme chés jôn.nes filles pou ch’ concours ed Miss. I n’y manque pus fauqu’ Genevièfe ed Fontenay, Jean-Pierre Foucault pis cor Alain Delon. Faut vir comme on est chi faraudé [26] toudis qu’on nous brouche [27]. Os n’ons mie pus l’droèt d’avoir du brin [28] à sin cul, qu’a m’o dit Muguette !
Tous ches injes [29], montbéliartes, limousines, bleu d’ech Nord, rouche flaminte, qu’al sont apprêtées edpis un biau copon d’temps [30] pour elles aller défiler ..Queule affaire pour eune belle tite vaque, énon ?
Un bon candidot qu’in peut l’y avoir fiate [31], i n’peut mie duire à ches cinsiers si qu’i n’est poent adité [32] pis amanièré [33] liméro un à aflater [34] l’cul d’ches vaques, ébleui par ches flashes, ches lanternes pis cor chés caméras. Gn o mie parsonne qui pouilloèt ténir carrure à [35] Chirac pour cho, pis i n’est poent prêt d’ête rimplaché.
Tous ches prétindeux, il ont des mains trop blanques, i n’ont poent l’ trèle [36] ed mette leus doègts dù qu’i faut. Pis asteure qu’ « Ej trousse Quand » i n’est pus dins l’courage [37] à l’ Élysée, i nous manque echl l’homme d’afu [38] du pochage [39] ed cul.
Gn o eune capignure [40] ed ches pus ingagés pour gagner chelle croupe ed France, qu’al peut canjer ch votage qu’i gn éro le 22 d’avri pis el 6 ed maï pour cujir ech nouviau prézidint. Mefie-t-à ti, ch poulitique, à forche d’ête à l’cul d’ech bétal, tout comme eune fème toute nute rétindute [41] padzeur ech lit, ed prinde in rude cop d’ queue.
M’apinse, si qu’ Magritte, Muguette pis Vinque, alz ont été fin bien habituées à leu mason. Suppoze qu’on lzo bien patriquées [42] pis tripotées [43] pou n’ poent ête seurprinses u bien core pus pire afolées [44] par el drache [45] d’aflatages [46] qu’ à s’in vo quère [47] edsus leus babaches ed cul [48]. Si qu’on n’o poent eune buque idée d’cho qu’ cha n’ n’est, on peut attraper des chuques [49] et des machuques [50] in plein dzeur ech rond d’jite. Si qu’cho vous ariv’roèt ,lo, ch’est pardu pou ch’ liston [51] bleu, blanc, rouche.
Allez, Magritte, Muguette, Vinque, ej vous souhate coraje [52] pis passyinche. Pour vouzautes, faut durer fauqu’ dix jours, à Paris, dins l’ Cour Jeannette à Vaques, nouzautes, ch’est pour chinq ans qu’i faura qu’on indurche [53] ch’ prezidint…

Le 25/02/2012

Dziré (Ablain Saint Nazaire, 62)


[1glorieusse : vaniteuse, aimant la parade et la parure

[2bouzo : bouse, excrément de bovin

[3faire el krânne : faire le faraud, le fier, l’important

[4dins l’ cour Jeannette à Vaques : par dérision du « show » des hommes politiques au Salon de l’Agriculture, rappel de la berceuse de Desrousseaux « le P’tit Quinquin » ; au troisième couplet, la dentellière promet à Narcisse qu’elle n’arrive pas à endormir de le conduire au spectacle de marionnettes « dins l’ cour Jeannette à Vaques »,courée lilloise.

[5étape : étable

[6berkrie : bergerie

[7ratriner : ramener

[8palle : paille

[9abruvoir : abreuvoir

[10mânner : mener, conduire

[11méchoneusse : moissoneuse

[12copilleusses : ensileuse

[13apatler eune pompe : amorcer une pompe

[14akeuter : mettre d’aplomb, caler

[15cuisage : cuisson

[16pékeume : cuisine

[17malaju : malaisé, incommode

[18simétri : difficulté

[19ch’est ch’ coq : c’est le summum

[20cujir : choisir

[21imbête-gins :tracasserie

[22duire : plaire

[23vinque : pervenche

[24invoée : partie

[25prime : prix

[26faraudé : toiletté avec soin

[27broucher : brosser

[28brin : excrément, merde

[29inje : race

[30copon d’temps : un bon bout de temps

[31qu’in peut l’y avoir fiate : à qui l’on peut faire confiance, fiable

[32adité : habitué

[33amaniéré : qui sait comment s’y prendre, qui a la pratique, la manière

[34aflater : caresser

[35ténir carrure à : contester la suprématie

[36trèle : habitude, manière de faire

[37courage : action de courir, course

[38homme d’afu : professionnel, homme compétent

[39pochage : pelotage

[40capignure : lutte, bagarre

[41rétindute : allongée

[42patriquer : manier grossièrement

[43manier grossièrement, toucher sans nécessité

[44afoler : blesser, meurtrir

[45drache : pluie forte

[46aflatage : caresse

[47quère :tomber

[48babache : joue – babache ed cul : fesse

[49chuque : heurt, contusion

[50machuque : heurt, contusion

[51liston : ruban

[52corage : courage

[53indurche : subjonctif d’indurer : supporter


Agenda

<<

2018

 

<<

Avril

 

Aujourd’hui

LuMaMeJeVeSaDi
2627282930311
2345678
9101112131415
16171819202122
23242526272829
30123456
Aucun évènement à venir les 6 prochains mois

Brèves

contacter les rédacteurs

lundi 28 mars 2011

J’ai rchu quiques messaches invo.yés par ches lijeux. Jé lzé li, pis core j’ai poent pouillu rinfliquer pache vous messaches i sont invo.yés dins m’ boète à lette par ech manicraque. Pour mi savoir édu adercher l’ rinflique, fauroèt qu’os laichèches vou adrèche mail dins ch tesque d’ech messache.
Amiteuzmint
Dziré

Pour une réponse personnalisée à un contact avec un rédacteur, il est indispensable de laisser votre adresse mail dans le corps du message.