Queullé nouvèles, el diminche 11 ed mars 2012 ?

A l’mote La Fontaine aveuc ech rot [1] d’ches villes pis ch rot d’ches camps, gn o chi deux artiques à preupos ed deux garchonnals [2] ed quinje ans.
Ech premier i est fort connu i resse à Villabrin [3], même à Paris aveuc sin père à l’Elysée. Ech sale gaspiot-lo [4], Louis Sarkozy, i s’abagne [5] à jechter [6] des mapes [7] pis eune tomate après l’ ravisoir [8] d’eune briskote [9], qu’a s’truvoèt padvant chl liméro 55 d’ech fourbou [10] Saint-Honoré. Echt agint d’ police al o rchu eune tomate et pis un mape edsus s’babache [11]. Chale briskote al o trécopé [12] l’ cauchie [13] pis al o dmindé à ches gindarmes ed warde à l’ Elysée, qui qu’ ch’est qu’il éroèt bien pouillu chibouler [14] comme cho un arprésintant d’l’orde public. Ches gindarmes i n’ont poent eune buque caché des tournures [15], il ont dit qu’ch’étoèt Louis Sarkozy aveuc ses deux comarates, qu’il avoètt’nt bombardé l’briskote.
Queul affronté [16] qu’ ch’est d’ cho ? Queu rongneux [17], énon ?
À mn idey qu’i fauroèt n’pus pa.yer ches allocations à ses parints, qui n’saitent poent induquer leuz éfants !
Ch’étoèt Louis par chi.

D’un aute côté, à Villazap [18], à Saint-Pô, pour tout bien dire, gn o eune foire agricole, eune cour Jeannette-à-Vaques, edù qu’in fait un concours ed tartes. Vlo cho qui faut faire pour animer [19] ches garchonnals. Eh ben ch’est Prézidint d’chés pousseux d’ chicons qu’il o armis ch prime [20] à Louis Degouve un garchonnal saint-poloès d quinje ans !
Ch’est fin bien min loute !
Ch’étoèt Louis par lo.

Le 11 mars 2012

Dziré (Ablain Saint-Nazaire, 62)