QUEUS RONGNEUX !

Quels moutards aux questions saugrenues !
dimanche 13 mai 2012
par  Dziré

Des foés, énon, chés saprés hirchons [1] d’éfants is vous faitent-é des réponses qu’i gn’o sacordié d’quoè n’in picher [2] dins s’quémiche [3] ed rire ; mais gn’o des foés étou [4] qu’is ditent-é des coses à chés gins qu’i gn’o d’quoè n’in v’nir rouches dusqu’à pad’zeur el bout de ses orelles.

Cor pus mius, ch’est quand qu’is posent-é des questions qu’on est core bien souvint prêt prins [5], énon ?
Après chl’ aubate [6] d’ech votache [7] ed présidint qu’os avons induré [8] des smân.nes pis des smân.nes qu’on o passées à épruver [9] d’démucher [10] tous ches cacoules [11] tous ches bleusses [12] qui gn in o qui voloètent-é nous faire accroire.

Vlo qu’à France-Info, il ont un questionnache ed jornalisse par des garchonnals [13], pis qu’il ont volu parler d’ech canjmint d’ prézidint, qu’os érons mardi 15 ed mai.

Ches jôn.nes il ont volu savoir si qu’i gn o poent d’imbroule [14] aveuc ech bouton pour faire camper [15] el bompe atomique. On leuz o aspliqué qui gn o des gins qui doètent-é suire [16] cho qu’on fait aveuc ech sapré bouton, cho fait qu’ech présidint i n’est poent tout seu à connoîte ech code.

Après cho, il ont dmindé si qu’ech présidint il étoèt forché [17] d’ rester à l’Elysée. Asseuré qu’non ! I fait à s’mote [18], eslon sin bon plaiji, comme dit chti-lo.

Gn in o qu’il ont volu savoir combien qu’ ch’est ch’ gagnache [19] ed présidint : ben, ch’est 16500 uros tous les moès pis queute cosse comme 21 300 uros si qu’on compte aveuc ches indemnités.

Ch questionnache il o vnu fin farce [20] quand qu’i gn in o un qu’il o volu savoir quoè qu’ch’est qu’i s’passe si qu’ech nouviau présidint i défuncte [21]. T’as qu’à vir queus des rongneux [22] qu’ ch’est d’ cho. Gn o deux cas qu’i dit chl avocat. Si qu’ech défunctache i vient après l’inroyache [23] ed sin mandot, nous r’vlo dins les coules d’ech gvo d’bos [24] ! Ch’est ch’présidint du Sénat qu’i l’rimplache, pour arfaire un nouviau votache. Faut arqueumincher tout ch’ votache edpis chl hôtel Sofitel ed Nouillork [25], ches primaires socialisses pis dminder à Sarkozy d’arnir [26] s’espadronner [27] aveuc el glène [28] halal (j’ai dit glène halal poent ches glènes Royal ! nettiez un molé vous orelles !), pis l’ravinchmint [29] du pa.yache [30] d’ ches pinsions [31] el premier à l’plache d’el 8 d’ech moès ! Faura core racouter [32] Guéant nous conter qu’ el chivilization d’ches gins Vimy, al o gramint d’plusse ed valissance [33] equ toulzautes chivilizations !
El pus pire, qu’i dit chl avocat, ch’est si qu’ech défunctache i vient intar deux el 6 ed mai pis el 15 ed mai. In constinote [34], ch’est queute cosse qu’on attind poent. Suppoze, qu’on n’peut poent faire comme pou ch’Tour ed France, quand qu’ech premier il o invalé d’al drogue pour li gagner, on fait passer ch duzyème in premier. Os veyez cho d’ichi, tous ches-lo qu’il étoètent-é fin bénaches d’avoir dégommé [35] Colas Minteux, ed l’artruver [36] comme un diale àz arsorts [37], printe el plache à Chos Normal [38]. Gn in éro poent-lo eune buquette ed sin [39], énon ?
Mais, cho n’est poent écrit dins ches règs. Faut vir aveuc ech Consèl Constitutionnel.

Gn o core eune ed question qu’al est fin farce : « Et si li prind eune boutarde [40] à ch pétit père Franchos, pis qu’i n’ veut pus ête prézidint ? ».
N’in vlo d’eune bonne question, min garchon ! Cho ch’est core possipe, mais pourquoè qu’il s’o dévoré au traval [41], pour li mâner campane edpis el mitan d’octope 2011 dusqu’à ch sich ed maï 2012, si ch’est pour arnoncher à s’plache, in veyant l’brin [42] laiché par chti qu’il o passé lo padvant li !

Bon corage [43] tut d’même, Chos !

Le 13/05/2012

Dziré (Ablain Saint-Nazaire, 62)


[1hirchon : hérisson ; moutard

[2picher : pisser, uriner

[3quémiche : chemise

[4étou : aussi, itou

[5prêt prins : pris au dépourvu, à l’improviste

[6aubate : fig. grande souffrance morale

[7votache : élection

[8induré : supporté

[9épruver : essayer

[10démucher : découvrir

[11cacoule : mensonge

[12bleusse : mensonge, blague

[13garchonnal :adolescent

[14imbroule : gène, embarras

[15camper : exploser

[16suire : suivre, vérifier

[17forché : obligé

[18à s’mote : comme il veut

[19gagnache : rémunération

[20farce : amusant, plaisant

[21défuncter : décéder

[22rongneux : litt.galeux, fig. moutatd

[23inroyache : mise en route, début

[24ête dins les coules d’ech gvo d’bos : c’est partie remise, tout est à refaire

[25sofitel de New-York, le 14 mai 2011

[26arnir : revenir

[27s’espadronner : gesticuler

[28glène :poule

[29ravinchmint : anticipation

[30pa.yache : paiement

[31pinsion : retraite

[32racouter : écouter de nouveau

[33valissance : valeur

[34in constinote : en vérité

[35dégommé : destitué

[36artruver : retrouver

[37diale az arsorts : diable monté sur ressorts

[38Chos Normal : François le président « normal »

[39poent eune buquette ed bon sin : pas une once de bon sens

[40boutarde : caprice

[41s’dévorer au traval : s’épuiser

[42l’brin : le désordre, l’état lamentable

[43corage : courage


Agenda

<<

2018

 

<<

Avril

 

Aujourd’hui

LuMaMeJeVeSaDi
2627282930311
2345678
9101112131415
16171819202122
23242526272829
30123456
Aucun évènement à venir les 6 prochains mois

Brèves

contacter les rédacteurs

lundi 28 mars 2011

J’ai rchu quiques messaches invo.yés par ches lijeux. Jé lzé li, pis core j’ai poent pouillu rinfliquer pache vous messaches i sont invo.yés dins m’ boète à lette par ech manicraque. Pour mi savoir édu adercher l’ rinflique, fauroèt qu’os laichèches vou adrèche mail dins ch tesque d’ech messache.
Amiteuzmint
Dziré

Pour une réponse personnalisée à un contact avec un rédacteur, il est indispensable de laisser votre adresse mail dans le corps du message.