EL RACINE CLEUPE DU LOUFE À UN INGLÈS !

scoop ? indiscrétion ? bobard ?
samedi 2 juin 2012
par  Dziré

Mi, j’ai intindu eune vaque [1] braire [2], pis j’sais core dins queulle étape [3] qu’al o beulé [4] !
Vintarti, el prémier d’juhin, ech porteux d’ gazettes [5] il étoèt core un cop [6] à l’atarge [7] pour li apporter ches incordlages [8] à ch’ marchand d’ gazettes. Cho fait qui gn avoèt poent d’ jornals dsus ches écobars [9]. Jé m’dijoès in d’dins d’mi-même, « pos d’ nouvelles, bonnes nouvelles », mais vlo qu’el marchande ed gazettes al m’o esclandi [10] un escret d’ porichinelle à preupos d’ech fotbal à Lins.

El Racine Cleupe du Loufe [11] à Lins, ch’est queute cosse dins nous pa.ys d’ Artoès, savez mes gins !
Echl l’année chi il ont té fin arluijant [12] ches fouteux [13] foutants [14] d’ Artoès. Fouteux ? fouteux d’ quoè, énon ?
El Racine Cleupe du Loufe à Lins, Martel in tête, il o manqué d’ardévaler [15] d’eune division. Ch’t’à croire qu’il ont leus flicrons [16] mal plachés ches albrans-lo [17], u bien qu’il ont des pieds d’oujon [18] à l’bout d’leus gambes. Toudis est-i qu’i gn in o un Inglès qu’i veut racater [19] ch’ cleupe ; core eune nouvelle à n’in caire [20] sin cul dins l’ cuvelle ! Quoè qu’ ch’est qu’ cho porroèt li rapporter à chl’ Inglès, el’ Racine Cleupe du Loufe, dins l’ étot qu’il est achteure ! Ch’ n’est poent eune buque vindape [21] comme el puchlage [22] Jeanne d’ Arc.
Pétète equ ch’est pour li faire un bistocache [23] à l’ Reine d’ Ingelterre, pour sin ju d’bidet [24] d’sochante ans, d’hasard [25] ?

Le 02/06/2012

Dziré (Ablain Saint-Nazaire, 62)


[1vaque : vache

[2braire : pleurer

[3étape : étable

[4beuler : meugler

[5porteux d’gazette : distributeur de journaux

[6core un cop : une fos de plus

[7à l’atarge : en retard

[8incordlage : colis

[9écobar : rayon, présentoir

[10esclandir : faire courir de fâcheux bruits, divulguer ce qui devait rester caché

[11Racine Cleupe du Loufe : pour RCL, Racing Club de Lens, Loufe pour Louvre

[12arluijant : reluisant, brillant

[13fouteux :joueur de foot

[14foutant : qui fait pester, qui cause du dépit, du désagrément

[15ardévaler : redescendre

[16flicron : crampon

[17albran : individu de peu d’énergie et ordinairement pauvre d’esprit, en même temps que paresseux

[18oujon : oie

[19racater : acheter

[20caire : tomber

[21vindape : vendable

[22puchlage : pucelage

[23bistocache : cadeau en patois lillois

[24ju d’bidet : altération de jubilee

[25d’hasard : à l’occasion


Agenda

<<

2018

 

<<

Juin

 

Aujourd’hui

LuMaMeJeVeSaDi
28293031123
45678910
11121314151617
18192021222324
2526272829301
Aucun évènement à venir les 6 prochains mois

Brèves

contacter les rédacteurs

lundi 28 mars 2011

J’ai rchu quiques messaches invo.yés par ches lijeux. Jé lzé li, pis core j’ai poent pouillu rinfliquer pache vous messaches i sont invo.yés dins m’ boète à lette par ech manicraque. Pour mi savoir édu adercher l’ rinflique, fauroèt qu’os laichèches vou adrèche mail dins ch tesque d’ech messache.
Amiteuzmint
Dziré

Pour une réponse personnalisée à un contact avec un rédacteur, il est indispensable de laisser votre adresse mail dans le corps du message.