Ch’est intindu, Guy Delcourt, ech maire ed Lins, i veut core rester sin cul dzeur pusieurs cayelles [1] : maire, député, consiyer communautaire. I n’o poent foute [2] d’ech règ [3] « non-cumul des mandats » à Martine Aubry. Pis, qua’même, pou l’ Sainte-Barpe [4] ed 2012, Guy Delcourt i veut rester ch’ maire ed Lins pour li raccoler [5] Hollande présidint d’el République, quand qu’i varo [6] coper [7] ch’ liston [8] à troès coleurs à ch’ Loufe [9] ed Lins.
À Lins, il étoètt-é fin [10] glorieux [11] d’leu fotbal pis fier-nés d’attinde ech nouviau musée du Loufe à l’ définition [12] d’l’année 2012. On o fait gramint d’arportaches à l’télé dsus chés vèfes [13] ed mineurs qu’al vont l’y aller près [14] à ch musée, quand qu’alz éront déféni d’ chucher [15] leu goutte ed ju [16]. Asteure, qu’ el Rachine Cleupe du Loufe [17] il o fait « bardouf » [18] dins ch’ gouffe [19], à Lins, ech fotbal cho n’in vaut pus eune berluque [20] el parlache [21]. Même Gervais Martel i s’o fait épourer [22], ech l’abloquemint [23] par un inglès [24] ch’étoèt eune rude [25] cacoule [26]. Dins l’ momint d’asteure, faut mius parler d’ ches biozarts [27], savez, ches tabliaux pis ches postures [28].
Pour mi quemincher [29] d’n’in parler, j’ai cuji [30] eune escultrice lommée Louise Bourgeois, mitan francèze, mitan americân.ne. Après qu’al euche fait des postures étampées [31] pis durtes [32] in bos [33], vlo qu’Louise a s’met à patriquer [34] des matryows [35] soupes [36] pis pochapes [37]. Ech coulache ed plate [38] pis el soupté [39] d’ech cayoutchouc [40], cho li duit [41] pour elle faire des jus [42] qu’il arsânnent cho qui vit, ches gins, ches bêtes ches plantes, et pis core à qu’is’arprézintent-é ech l’arfuche [43], ech nid. Adont, Louise, al fait core gramint [44] d’ postures qu’al portent dzeur des morsiaux [45] d’ech corps, pus souvint el bisse [46] u bien el bite [47]. Vlo ti poent qu’ Louise Bourjoès, a nous o fait in cayoutchouc padzeur du plâte, eune oeufe [48] à pinde [49], ed 60 par 27 pis par 20 chintimètes, qu’al o délommée « fillette ». Ch’est core souvint qu’ Louise, pour elle s’abagner [50], al balle [51] un tite moquar [52] quasi contrèle [53] à chl oeufe, « Maman » ch’est eune arignie [54] gaïante [55] qu’al fait placher padvant l’intrée d’ ches musées, « Fillette » ch’est chl afutyow d’ches honmes, pou n’ poent dire el biloute [56], fait in plâte armuché [57] par du cayoutchouc. Echl artisse a s’fait photographier par Robert Mappelthorpe, in route à bercher [58] l’posture d’ barliko tout in beyant [59] d’un oeul malin ech raviseux [60].

Fillette cha o vnu l’inblinme [61] d’esn oeufe. Ch’est core souvint qu’al fait des fourmes [62] d’afutyow, pour elle cho veut dire gramint d’ cosses In preume ch’est « érotique », savez, queute cosse qu’il intrîne à l’amour pache qu’au qu’minchmint d’toute gn o ch sulvache [63] à coquer [64], pis chl animation [65] d’ches artisses pour li bailler fourme dins l’art.
Seulmint, quand qu’al nous ravise [66] aveuc ses yux moquars [67], chl’ artisse, fillette-affrontée [68] a s’ prind pou l’« biloute » qu’al sare [69] dins ses bros, pis qu’al veut faire passer pour un ju d’fème [70]. Echl oeufe-lo ch’est bien asseuré eune fourme ed biloute, mais ch’est tut d’ même eune sorte ed personnache malapatte [71], aveuc eune couvarture, qu’on peut dire equ ch’est marle [72] tout comme on peut dire equ ch’est fumelle [73], pis core aussi equ ch’est éfant [74].
Fillette al o in haut un agrépin [75] pour l’ahoquer [76] à ch plafond. Quand qu’on l’ravise d’in-bos, on voèt bien ches deux boules, ch’est forchémint ches varzelles [77], mais pour Louise Bourgeois, cho fait pinser à ches tètes [78]. In 1966 Louise al avoèt fait eune oueufe equ « Fillette » cha porroèt-ête sin marle, ch’étoèt « Regard » eune sorte d’oeu [79] in cayoutchouc pis in drop [80], equ cho rsânne [81] el trongnère [82] aveuc eune finte [83] au mitan [84]. El finte au mitan ch’est comme l’in-ddins d’ches loupes [85] ed bisse tout du même qu’ech cuin d’l’oeul [86], savez el jointure [87] ed ches paupières. Si bel et si bien qu’on pinse equ Louise al fait un loïen [88] intar deux chl oeul pis l’ trongnère. Louise Bourjoès, ch’est quiqu’un qu’il o gramint fiate [89] à ches idées Sigmund Freud, savez ch père d’el sykanalysse. Ch’est fin malaju [90] ed détouiller [91] chou qui s’passe dins s’ cacuche [92], énon ? M’apinse, si ches déchindants [93] d’ ches carbonniers [94], i vont indurer [95] ch canjmint d’ pâture-lo [96] ?

Le 12 septembre 2012
Dziré (Ablain Saint-Nazaire, 62)